Lalchamliana, Home Minister hovin vawiin khan ‘Inter national Day Against Drug Abuse and Illicit Trafficking’ denchhenin ruihhlo Rs. 2,34,02,17,045 man hu Trinity Hospital, Silaimual a bawlhhlawh halralna khawl hmangin Mizoram Police ten ruihhlo an man te halral a ni. He hun hi Neihchungnunga, IPS, DIG(CID) Crime leh Chairman, High Level Drugs Disposal Committee in a kaihruai a ni.
Lalchamliana chuan drugs tawlhruk leh hmansual hi khawvel pumin a buaipui a, tih rem dan tur a ngaihtuah reng a ni. Drugs titu te hian an mahni mai bakah, an chhungte leh khawtlang an tih buai thin avangin, drugs ti lo tura inzirna hi chhungkua, zirna in, khawtlangah te uar leh zual a kan inzirtir a ngai a ni a ti. Supply reduction a pawimawh rualin demand reduction tura hmalak mek a nih thu sawiin Minister chuan mipuite hnenah drugs tih thatloh zia kan rilrua tuh ngheh a nih chuan kan ziaawm deuh a beisei thu a sawi. Drug addict te pawh misual ber ang mai a en lovin, damlo tanpui leh enkawl ngai an ni tih rilru puin, drugs dona kawngah Police, Excise and Narcotics, Assam Rifles, YMA, Kohhran te theihtawp chhuah zel turin a sawm.
Lalchamliana chuan Narcotics Control Bureau Office, Aizawl leh Champhaiah dah dan tur ngaihtuah mek a nih thu a sawi a, District dang ah pawh Drugs Court-in tih ral a phal tawh te tihral a nih thu a sawi bawk.
Devesh Chandra Srivastva, IPS DGP Mizoram chu khualzahawm niin hemi hunah hian drugs do chu Mizoram Police tana hna pawimawh ber te zing ami a nih thu a sawi.
Tunkar chhung hian district hrang hrang Police ten theihtawp chhuah in ruihhlo dona kawngah hian hma a la a. Thalai te leh mipui hnen ah te hrilh hriat hna (awareness campaign) nasa takin a kalpui a. Awareness campaign hi School 39 ah neih niin Signature campaign pawh hmun tam tak ah neih ani bawk.
International Day Against Drug Abuse and Illicit Trafficking chu 26th June, 2022 hi a ni a, mahse Pathianni a nih avangin vawiin khan hman a ni.
