Union Home Minister Shri Amit Shah kaihhruai in Pathianni khan Guwahati, Assam ah Hmarchhak State 8 te Chief Minister, Chief Secretary leh DGP te hovin ruihhlo tawlhruk leh ramchhung venhimna ‘Drugs Trafficking and National Security’ chungchangah meeting pawimawh tak neih a. Hmarchhak a ruihhlo tawlhruk chungchang leh a dona atana hmalakna tur hrang hrang te chu meeting ah sawiho niin Union Home Secretary, Director General Narcotics Control Bureau(NCB) leh official pawimawh midangte an tel bawk a ni.
Union Home Minister chuan meeting pawimawh tak neih chhan te chu sawiin Sawrkar Laipui chuan ruihhlo tawlhruk hi a vei tak zeta, a zung atanga tihtawp a nih theih nan thapui chhuahin hma a la mek a, hemi kawngah hian chak leh zawka Hmarchhak State zawng zawngte thawhpuia hmalak ho a duh a, chung kawngte sawi turin meeting hi Guwahati ah neih a ni, a ti. Ruihhlo tawlhruk chu ramri kham nei lo dan bawhchhiatna, borderless crime a nih avangin drugs enforcement leh intelligence agency hrang hrang te hemi kawngah an thawhho a tul mai bakah Hmarchhaka a ramri hrula awm District zawng zawngte nen pawh hmalak ho a tul a ni, a ti.
Hmarchhak ah ruihhlo hmansualna a nasat thu sawiin, India hmarchhakah hian ram dang pali ramri tawmpui ka nei a, Myanmar phei chu Afghanistan dawta khawvela opium siamchhuak hnem ber a ni, a ti. Tunhnaia ruihhlo tawlhtu syndicate ten Hmarchhak mite address leh bank account te thiam takin an hawh thin bakah thil thar tun hmaa an la tih ngai loh an tih hmuhchhuah a nih thu a sawi. Ruihhlo hi centre-state issue a ni lova, rampum issue a ni a, chuvangin rampum huap anga hmalakna neih a tul a ni, a ti.
Union Home Minister chuan Hmarchhak state te chu ruihhlo tawlhruk dona kawnga NCORD portal leh NIDAB platform te hmang tangkai turah a chah bakah state tina din Anti Narcotics Task Force te thuamchak turin a chah bawk a ni.
Meeting a tel Chief Minister Zoramthanga pawhin thusawiin, ruihhlo tawlhrukna chu chak zawka do anih thei nana hma lakna hrang hrang kalpui mek te a tarlang a. Ramri venhima chungchanga thil pawimawh leh tul hrang hrang te a sawi bawk a ni.
Meeting a tarlan danin kum 2006-2013 chhungin ruihhlo tawlhruk thubuai 1257 ziahluh niin a kaihhnawihah mi 1362 man an ni a. Thubuai ziahluh hi kum 2014-2022 chhungin za zelah 152 ah pungin thubuai 3172 ziahluh a ni a, hemi hun chhungin mi 4888 man an ni thung. Kum 2006-2013 chhungin ruihhlo kg nuai 1.52 man niin 2014-2022 chhung kha. hei hi a let a pungin, hemi hun chhunga ruihhlo man zat chu kg nuai 3.30 ah a pung a. Kum 2006-2013 chhungin ruihlo cheng vaibelchhe 768 hu man niin, kum 2014-2022 hun chhungin hei hi a let 25 ah pung chho in, hemi hun chhungin ruihhlo cheng vaibelchhe 20,000 hu man a ni.
