Thawhtan (21.11.2022) zan dar 11:45 PM vel khan mi tu tih hriat loh ten ruihhlo ni ngeia rin, ‘MZU road’ kawngsira an thukru lai hmuh anih thu Zonuam Outpost (Aizawl District)-ah report a ni a. Police party leh hriatpuitu civil mi 2 te a hmunah thleng nghalin, zanlai pelhah uluk taka zawn anih hnuah, kawngthlang meter 12 vel, hnim zingah ip lian tak, a chhunga polythene dum (parcel) 22 awm chu chhar a ni a, endik anih hnuah heng parcel chhungah hian heroin, sahbawn bawm/hawng 215, Kg 2.76 a rit, international market-a cheng vaibelchhe 13.8 chuang man chu hmuh a ni a. Vaivakawn PS-ah thubuai 21(c)/28/29 ND&PS Act ziahluh nghal niin, he ruihhlo kaihhnawih dangte hriat tuma chhui mek a ni.
Police te chuan, “Ruihhlo dona hi mipuite, tlawmngai pawl leh a kaihhnawih pawl hrang hrangte nena thawhhona leh puihna nen chauha hlawhtlin theih a ni. Ruihhlo kan dona kawnga theihtawpa min thawhpui zel turin mipuite kan ngen thar leh e,” an ti.
