Lawngtlai distrcit chhunga Rulkual khua-ah vawiin khan current man avangin mi 3 in nunna an chan a, midang 2 in hliam an tuar bawk a. He chanchin buatsaih lai hian hliam tuarte hi biak theih an la ni lo niin thudawnna chuan a tarlang.
The Lawngtlai Post Editor Lalngheta Ralte hnen atanga thudawn danin, Dt. 12, Oct 2022 khan Rulkual atanga 4Km vel a hla-ah thing tlu in power line a vaw chat a. Line chhiatna hi ramhnuai, tlema khawih harsa lai deuh te anih avangin department lamin khawtlang lam punin, vawiin khan Power Department kaihhruaina hnuaiah hnatlangin power line chhia hi siam a ni a. Hetia line chhia an siam mek lai hian vanduaithlak takin power a rawn kal thut a, chu chuan line siama lo thawk mek te chu manin, a hmunah mi 3, Samuel Lalthianghlima, Lalramdinpuia leh Lalrinchhana te chu an boral nghal a. Midang pahnih Lalrinenga leh Lalnghawrliana chu chanchin buatsaih anih lai hian Lawngtlai lam panpui mek an ni.
Rulkual YLA President hnen atanga thu kan dawn danin Rulkual line hi Bungtlang South line nen kalkawp a ni a. Bungtlang South line hi chu a tha a, hetia an khaw line an siam lai hian Rulkual line lamah chuan power a awm lo a, Bungtlang South line lamah hian power rawn kalin khawi emaw laiah heng line pahnih te hi anlo in tawk anih an rin thu a sawi.
Laldawngliana E.E Power & Electricity Department Lawngtlai Division chuan chhiatna thlenna hmun hi a pan nghal a, khaw thenawm bakah Lawngtlai atangin mi engemawzat in vanduaina thlenna hmun hi an pan bawk.
Rulkual hi LADC a CEM V.Zirsanga chuan a pan nghal a, Information chengtu Executive Member Lalropuia Chinzah bak ah mipawimawh thahnemtak an kal bawk.
Postmortem tur in ruang te hi Dist Hospital Lawngtlai panpuii tura ruahmanmek a ni
