Aizawl April 13 : Vawiin khan Rural Development Minister Pu Lalruatkima hovin Planning & Programme Implementation Department Conference Hall-ah Rural Development Department hmalakna thlirhona neih a ni.
Pu Lalruatkima chuan COVID-19 hripui leng vanga hun rei tak chhung review meeting an neih theih loh hnuah hun tha tak an nei thei ta chu lawmawm tiin review meeting hmasa leh tun inkarah RD Department chhungah thil tam tak a thleng hman a ni, a ti a. RD hian Mizoram hmun tam zawk a tuam avangin ram tana hmasawnna hna tak tak thawktute an ni a, chuvangin thawktu zawng zawng te thahnemngai taka thawk turin a chah a ni. RD Minister chuan MGNREGS-ah nikum lamah cheng nuai 200 person days Mizoramin a dawng a, kum thum chhung ni zaah za, mipui inhlawhna an siam sak thei a, kumin atan nuai 175 person days mipui inhlawhna tur approval hmuh a ni tawh, a ti.
Shyama Prasad Mukherji Rurban Mission (SPMRM)-ah cluster 4 Mizoramin a nei mek a, sawrkar laipuiah dil belh mek a ni a, cluster dang sanction beisei mek a ni, Pu Lalruatkima chuan a ti a. BADP-ah Sawrkar Laipuiin payment system thar a hman tan tak avangin Mission Antyodaya nen Annual Action Plan inmila siam a ngai tawh dawn a, sawrkar laipuiin kalphung thar a phut ang te uluk taka zawm kimin, Ministry of Home Affairs atangin fund a tam thei ang ber pawh chhuah a ngai a ni, a ti bawk. Pu Lalruatkima chuan Sawrkar laipui atanga hmasawnna scheme dang PMAY-G leh PMKSY-Version 2-a hma an lakna te pawh a sawilang a. Hei bakah hian Mizoram Sawrkar flagship programme SEDP hnuaiah Deputy Commissiner theuh te Chairman-na hnuaiah District Level Committee din a nih tawh thu te, Project Director te chu Member Secretary atana ruat an nih thu leh State Sawrkar flagship programme a hlawhtlin theih nan theihtawpa tan lak a tul thu te a sawi a ni.
RD Department Secretary Pu R.Zarzosanga chuan MGNREGS hnuaia timely payment chungchangah Mizoram chu India ramah a ti tha ber te zingah a tel thu a sawi a. Kum kaltaah khan T+8 days chhunga FTO generate hmanah 98.58% an ni mek a, ni 9 hnu lama FTO generate chu 1.42% chauh a ni, a ti a. Zaah za an achieve theihna turin District leh Block tina thawktute tanla leh zual turin a sawm. Hna thawh chak zawk work completion rate-ah pawh India ramah State ti tha ber zingah Mizoram a tel thu a sawi a. Kum 2020-2021 ah 99.51% niin 2021-2022 ah hian 87.21% a ni. Secretary chuan Natural Resource Management lamah theihtawpin Mizoram Sawrkar RD Department in tan a lak dan a sawi a. Kum kaltaah khan 78.41% an achieve thu leh hetah pawh hian India rama hma la tha ber zinga an lan thu a sawi bawk.
