Vakrangee Kendra hnuaia Mizorama mimal enkawl ATM Booth 5-na chu vawiin (Dt.28th May, 2025 Nilaini) chawhnu dar 1:00 PM khan Aizawl Mualpui Mizoram Rural Bank Branch office hnuaiah D3 Businees Enterprise neitu Dr. Lalmalsawma Nghaka chuan a hawng.
Dr. Lalmalsawma chuan, Aizawl khawpui hmun lunlaiah ATM Booth hawn thar a ni chu lawmawm a tih thu sawiin, mipuite leh heng lai hmuna infiammi fuankhawm ten tangkai taka an hman ka beisei a; service tha zawk leh changtlung zawk nena mimalin hma an la zel chu mipuiten a hlawkna an tel dawn a. Khawvel thang zel anga kan lo inher remthiam ve zel hi a pawimawh a, sum leh pai kan tihchetnaah tunlai thiamna hmang tangkai turin i inzir thar thin ang u. Chutiang kawnga mipuite tana remchanna chhawpchhuaktute pawh tang sauh sauh turin ka sawm a ni, a ti bawk.
ATM Booth hawnna hi Vakrangee Kendra Master Franchisee Sellai Lalrinawma chuan a kaihruai a, RBI hnuaiah dan ang thlapin mimalin eizawn nan ATM Booth a neih theih tawh tih sawiin, tunah hian Mizoram hmun hrang hrangah ATM Booth tam zawk hawng turin kan inbuatsaih mek a; khawchhung lunlaia building nei tha leh a ti duh apiang tan biak theih reng kan ni a, mimal enkawl ATM Booth hi ATM Booth dang nen a hmangtu tan engmah a danglam lova; ATM Booth-ah pawisa a awm reng bik dawn tih chu a danglamna tur a ni, a ti.
ATM Booth hawnnaah hian Aizawl Salem Veng Local Council Chairman K. Lalrodinga leh Mizoram Rural Bank Salem Branch Manager Lalruatkimi te pawhin Mualpui kawna ATM Booth hawn thar a ni chu lawmawm an tih thu leh mipuiten an awlsam phah hle an rin thu an sawi bawk a ni.
