Aizawl, April 12 : Vawiin chawhnu khan Education Complex Conference Hall, Mc Donald Hill, Zarkawtah Samagra Shiksha Mizoram leh Cricket Association of Mizoram te chuan kum nga chhung daih tur Thawhhona thuthlung an ziak a. Pu Lalzirmawia Chhangte, Secretary, School Education Department hriatpuinain Pu Lalhmachhuana State Project Director leh Pu C. Lalthanzira Addl. State Project Director ten Samagra Shiksha Mizoram aiawhin hming an ziah hnan a. Cricket Association of Mizoram aiawhin Pu Robert Lalfamkima, Hony. President leh Pu Mamon Majumdar Hony. Secretary ten an hming an ziah hnan thung a ni.
Dr Lalzirmawia Changte chuan Secretary, School Education Department chuan India rama infiamna lar ber leh sum tamna ber Cricket huangah Mizo thalaiten eizawnna an neih theihna tura hunt ha a rawn inherchhuak chu a lawm awm tak zet tih a sawi a. Mizo Sikul naupangte zinga talent nei tha tak tak te chher hriam nan Cricket Association of Mizoram(CAM) ten hun rei tak chhung BCCI hnuaia inziah luh tum a hma an lo lak dan te leh hruaitu te inpekna chu fakawm a tih thu a sawi a ni. Samagra Shiksha Mizoram leh CAM te thawhhona chuan Mizo naupang te tan malsawmna a thlen ngei a beisei tih a sawi bawk a ni.
He thawhhona hi a bul tanna nan Aizawl khawpui chhunga sawrkar sikul Primary leh Middle School thlan chhuah sikul sawmah kalpui phawt a ni dawn a. Kum thar atangin Aizawl pawn leh District dangah te kalpui zel a ni ang. He thawhhona tura inziah dan chuan naupang ten an zirlai tibuai lo thei tur ang berin kar khatah vawi thum Cricket khelin training an nei dawn a. Sum leh pai senso ngai zawng zawng leh Cricket thuam thil leh training na atana mamawh zawng zawng Cricket Association of Mizoram ten an tum dawn thung a ni.
Naupang talent nei tha zual te chu kumtin National Cricket Academy, Bangalore a traning an neih dan tur zawn sak a nih dawn bakah, Mizoram pawnah exposure trip neih tir thin an ni ang. Grassroots Cricket School-ah hian Qualified coach dah vek an ni dawn a. Naupang ten nun kawng dik an zawh theihna tur atan Grassroots Cricket School te hi inkaihhruaina hmun, zuk leh hmuam,ruihtheih thil laka an fihlim theihna tur atana hman tangkai tum a ni a. Hei hian Enrollment Drive leh Retention Drive pawh a huam dawn a ni. Grassroots Cricket School a zir chhuak te hi Cricket Association of Mizoram chuan Mizoram aiawh a National Age Level Tournament hrang hrangah player zawnna hmun pakhat atan a hmang dawn a. Heng bakah hian Inter School, Inter District Tournament huaihawt thin a ni dawn bawk a ni.
He thawhhona thutlung ziah inkhawm hi Pu Lalhmachhuana State Project Director, Samagra Shiksha Mizoram chuan a kaihruai a. He hunah hian Pu Mamon Majumdar Hony. Secretary, Cricket Association of Mizoram pawhin fuihna thu a sawi a. Cricket Association of Mizoram hruaitu te leh United Sports Association of Mizoram hruaitu te pawh he hunah hian an tel a ni.
