Vawiin khan School Education Directorate Conference Hall-ah Samagra Shiksha Mizoram leh Sports Association 5-ten thawhhona thuthlung an ziah leh Kick off programme an hman chu School Education Minister Pu Lalchhandama Ralte chuan khuallian niin a hmanpui. Association hrang hrang – Mizoram Boxing Association, Mizoram Badminton Association, Mizoram Football Association, Mizoram Weightlifting Association, Hockey Mizoram aiawhte nen thawhhona thuthlung hi ziah a ni.
Minister chuan he hunah hian thusawiin NEP 2020 bawhzuina kal zelah Discipline hrang hrang 5 te nen thawhhona thuthlung ziah a ni ta chu lawmawm a tih thu a sawi a. Minister chuan kum 2005 khan catch them young kalpui a lo ni tawh a, tunah a bulțhut zawk grassroot level-a thawhhona neih a ni leh ta chu a lawmawm hle a ni a ti. Project Approval Board 2022-23 țhutlai hi hrilenlai a la nih avangin tuna hmalakna ang chi-ah hian hnathawh theih dan tur hriatthiam a la har a, nakkumah chuan huam zau zawkin hmalak theih beisei a ni a ti. Naupang talent nei țha haichhuahnaah hian a bulțhut ațangin thawh a ni dawn a, vawiina MoU kan ziah hi a field-ah thawh a ni ang a, Sports Discipline hrang hrangten theih tawp an han chhuah ang a, kan țhalaiten an la hlawkpui hle dawn a ni a ti bawk. Minister chuan Trainer leh Asst. Trainer turte chu Department-in thlang mai lovin Sports Association tinte’n an rawn rawt chu lak an ni ang a ti a. He thawhhona ațang hian khawvel ramdangten an tih theih chu Mizo țhalaite’n an ti thei tih lantir a ngai a ni a ti bawk.
Vawiina thawhhona thuthlung ziahnaah hian Sports Association hruaituten Samagra Shiksha nena thawhhona țha tak a awm tur chu lawmawm an tih thu an sawi hlawm a, national leh international level thlengin rah țha tak a chhuah theih an beisei thu an sawi hlawm a ni.
Pu Zionparlawma DySPD, Nodal Officer Grassroot Level Sports Development Programme chuan report a pe a. Report-a a tarlan danin Samagra shiksha Mizoram chuan Grassroots Level Sports Development Programme (GSDP) atan hian Mizoram hmun hrang hrangah centre 40 a din dawn a. District tinah District Level Management Board din a ni dawn a, Board hian Trainer leh Asst. Trainer te District Sports Association te nen inrawntlangin a la dawn a ni. Centre nghah chhan school tur sawrkar sikul chu District Level Management Board ten an thlang ang a, he Programme hi Thla 6 kalpui tur a ni. Centre tinah naupang 30 zel an awm ang a, an zingah hmeichhia panga aia tlem lo an tel tur a ni. He programme in a tinzawn chu Elementary School naupang kum 6 -14 inkar sawrkar sikul naupang te an ni. Naupangte training na tur bungrua State Project Office atangin ngaihtuah a ni dawn a. Naupang zirna tibahlah lo tur zawngin kar khatah vawi hnih emaw vawi thum emaw Training hi neihpui țhin an ni dawn a ni. Training-na atana mamawh bungrua te chu Samagra Shiksha Mizoram in a tum dawn a ni.
Vawiina thawhhona ziah leh Kick off programme hmannaah hian School Education Department Director leh officer-te, Samagra Shiksha State Project Office-a officer te leh District tina District Project Coordinator te, Sports Association hrang hrang aiawhte an tel a ni.
