Vawiin October ni 22.2024 (Thawhlehni) khan MPYCC chuan Education Department hnuaia Samagra Siksha Mizoram leh Tharthilthlentu Entrepreneurship and MSME Support Society (TiLi) in ‘Project Intodelh Inzirtir a 2024-2025’ atana thawh dunna an ziah chungchanga dik lo taka pawisa in siam chungchang chhui turin Lokayukta-ah lehkha an thehlut.
MPYCC chuan, “Mizorama kan sawrkar hrawn mek ZPM party hian 2023 MLA inthlan hma khan thil tha tinreng tihtur an sawi a, an intiam a. Chung zinga pakhat chu, ‘Chhung leh khat, mahni mi leh sa leh midang tute pawh duhsak bikna lakah ka in thiarfihlim ang’ tiin an MLA candidate ten thu an tiam a ni.
“July ni 1, 2024 khan Mizoram sawrkar Education Department hnuaia Samagra Shiksha Mizoram leh Tharthilthlentu Entrepreneirship and MSME Support Society (TiLi) te chuan ‘Project Intodelh Inzirtirna 2024-2025’ atan inremna (agreement) an ziak a. He inremnaa a inziah ang chuan he project fund hi cheng 59,00,000/- a ni. Agreement-ah hian Education Minister, TiLi neitu leh Samagra Shiksha hotuten hming an sign a ni.
“He Project hi an ruahman dan chuan sawrkar School 10, High School 5 leh Higher Secondary School 5 thlanchhuah a, chunga school zirlai naupang te hnenah chuan Project Intodelh kalpui tur ani a.
“He Project hi Central leh State Fund 90:10 pattern hmanga thawh tur a ni a, Cheng nuaih 25 chung lamah chuan Project guideline angin Tender chhuah thlapa project kalpuitu tur thlan tur a ni. Mahse he Project ah hian guideline in a phut angin Tender chhuah a ni lo.
“He Project, Samagra Shiksha An Integrated Scheme For School Education Manual on Financial Management and Procurement 2024 Chapter 7.7 Sl. NO 7(c) ah chuan cheng nuai 25 chin chung lam chu Open Tender hmanga thlan tur ani a, Chapter 7.17.3 ah Open Tender koh dan tur pawh a inziak vek bawk a, heng hi tih a ni lo hrim hrim a ni.
“He Project atana pawisa an release dan tur hi agreement-a an ziah ang chuan an fund hmuh atanga 40%, cheng 23,60,000/- chu First Installment-ah Mobilisation Advance atan project agreement sign hunah pek tur a ni a, chu chu Project setup na atana hman tur a ni. Second Installment 30%, cheng 17,70,000/- chu Resource Person ten training an pek vek hnu a pek leh tur a ni a. Third Installment 30%, cheng 17,70,000/- chu Project zawh vek tawh hnua pek tur a ni.
“TiLi hi ZPM Spokesperson u fapa ta ani a, hetia party mi kan induhsak lovang titute hian danin a phut anga Tender leh Quotation pawh chhuah lova project lian leh pawimawh tak, sum tamtak awmna Advance Payment cheng 23,60,000/-(Nuaih sawmhnih pathum leh
sing ruk) lai mai an inpe mai hi a dik lovin induhsakna uchuak taka an kalpui duh hi Kalphung thar hian an hmui bak a pel lo ani tih a lantir a. An intiam ang leh sawi ang letling chiahin an kal leh si a, kalphung thar an sawi uar em em chu a taka hmuh tur a awm lo a ni.
“Chuvangin vawiin ni 22, October 2024 (Thawhlehni) hian hetianga mahni duhsak zawng dan kalh leh tender siam lova hna pek hi chhui chiang a atul anga action la turin MPCC chuan Chairman, Mizoram Lokayukta hnenah ngenna a thlen a. Tunhnuah ZPM party hruaituten hetiang thil hi bansan tawh turin kan ngen bawk a ni,” an ti bawk.
