Vawiin khan Lawngtlai District Sangau khua a Lai Students’ Association zirlaite chuan Gov’t Blue Mountain High School Sangau atanga Headmaster sawn chhuahtak Pu Denghmingliana Sangau a dah let phutin leh Gov’t Blue Mountain High School Sangau a post ruakte hnawhkhah phutin Sit in Demonstration an nei chhunzawm zel.
Vawiin hian Sangau khua a Gov’t Blue Mountain High School zirlaite lungawilohna lantirna hi Lai Students’ Association Sub Hqrs. Sangau chuan thlawpin Sangau khawchhunga LSA Branch dang awm pahnih, Blue Mountain Higher Secondary School leh Sangau Higher Secondary School (RMSA) LSA Branch ten an telpui bawk.
Sangau khua a Higher Secondary School pahnih leh Gov’t Blue Mountain High School Sangau a zirlai 200 chuangte chuan Sit in Demonstration hi kalpui chhunzawmin School pathum kharin vawiin pawh hian zirtirtute school kai tur an dang chunzawm leh a ni.
Gov’t Blue Mountain High School Sangau ah hian Mizo Teacher post pakhat bakah Non Teaching Staff LDC leh 4th Grade post te ruak in, tun dinhmun ah an zirtirtute atangin Headmaster a kaisang mi pahnih awmin Zirtirtu pahnih in he school hi an chhuahsan dawn bawk a, hetiang anih tak avang hian an Headmaster thla 3 chauh Sangau a la awm chu Sangau a la awm tir phutin leh Zirtirtu post ruakte chu tunthla chhung ngeia hnawhkhah phutin Sit in Demonstration hi an kalpui chhunzawm zel a ni.
Lai Students’ Association Sub Headquarters Sangau President B.Laldinliana’n Sangau a kan Correspondence a hrilh danin he Zirlaite lungawilohna hi an beiseite tihhlawhtlin anih loh chuan School kai lova Sit in Demonstration neih chhunzawm zel an tum niin a sawi.
