Aizawl March 29: Vawiin khan School Education Minister Pu Lalchhandama Ralte chuan Mizoram Samagra Shiksha hmalakna Sanitary Napkin Vending Machine leh Incinerator-te Govt. Mizo High School, McDonald Hill, Aizawl-ah a hawng.
Pu Lalchhandama Ralte chuan khawl pahnih hawnnaa kalkhawmte hnenah Sanitary Napkin Vending machine leh incinerator bun a ni ta chu lawmawm a ti a. He hmalakna hi hmeichhe naupangte phei chuan a tangkai hle dawn a ni a ti. Minister chuan hetiang vending machine hi zirlai hmeichhia 25 chin awmna sikulah pek theih a ni a, tunah hian school 817-ah bun a ni dawn a, school dangah bun belh zel tum a ni a, school 1300 vel-ah dah tum a ni a ti bawk.
Minister chuan hmeichhe naupangte hian mipate hriatpui loh harsatna an nei thin a, mi zinga awm an hreh avangin school kal loh phah te leh school bansan phah thlengin an awm thin a ti a. Hetiang kawngah hian Mipa naupangte pawhin hmeichhe naupangte dinhmun an hriatthiam theih nan zirtirtu bakah nu leh pa ten mawhphurhna pawimawh an nei a ni a ti. Sanitary Napkin Vending Machine chu khawl man to a nih avangin school neituten lo enkawl uluk a, lo vawng tha turte, khawl dahna turah hmeichhe naupangin an pan hreh lohna tur hmun te thlan tul a tih thu a sawi tel bawk a ni.
Pu V.L.Malsawma Dy SPD, Samagra Shiksha chuan report pein, Sanitary pad vending machine chu elementary school 547 leh Secondary leh Higher Secondary School 270 ah dah a ni dawn tih a sawi a. Heng khawl te hi district 7 ah phurh thlen a ni tawh a, district dangah pawh phurh thlen thuai tum a ni a ti a. Adolescence Health and Hygiene programme-ah hian vending machine bakah tleirawlte tan hriselna leh invawn thianghlimna kawngah awareness campaign neih tura ruahman a ni tih a sawi bawk.
