Sawhthing chungchang ngaihtuah nawn turin ngen : Vanlalruata

Aizawl 9th August, 2024: Vawiin chhuna party office-a thu sawiin, “Mizoram sorkar hi sawhthing chungchang ngaihtuah nawn turin PC Party chuan kan ngen a ni,” Pu Vanlalruata, PC Party President chuan a ti.

Vanlalruata chuan, Mizoram sorkar thuchhuak anga ngaih theiha tun hnaia sawhthing lei chungchang lo darh chuan mipui a barakhaihin a ṭhawng hle a, mi tam tak rilru a tina tih sawiin, “Sawhthing hralhna tur, research pawh nei fel vek tawha an insawi vangin mi tam takin sawhthing an ching a. Chung mite chuan hralhna tur dang a awm loh pawha sorkarin a leisak turah an ngai a. Chu chu campaign naa an intiam dan a ni a, video footage tam tak a awm a ni,” a ti a. Adviser to CM KC Malsawmzauva’n sawhthing zawng zawng sorkar lei tir tumna rilru put chu corruption anga a sawi dan te sawiin Pu Ruata chuan, “Sorkarin sawhthing a lei vek dawn nia ngaih hi corruption a ni lo a. Party mi duhsak zawng hlawh pek theihna tura nihna an pek chawp te, Dan pawngsuala contract leh supply hna an inpe chiam te hi corruption chu a ni zawk,” tiin hetiang thu chuangtlai sawi hi pawi a tih thu a sawi bawk.

Sawhthing lei chu an intiamna leh mipuiin vote an pek chhan lian ber pakhat anih avangin ZPM kaihhruai sorkarin tihhlawhtlin an ba, a ti a. “Research nei lawk anga an insawi a dikloh zia a lang chiang telh telh a. Chumai ni lovin tun thlengin sawhthing hralhna tur an la hre lo hi mipui tan a pawi a ni,” tiin Pu Ruata chuan sawhthing chungchanga thutlukna ennawn a, mipui tana hma la thuai thuai turin sorkar a ngen a ni.