Sawhthing lei tur chungchangah Chief Minister chuan ZPM General Secretary rualho hnenah Grade A leh B ang zawnga kalpui a nih dawn loh thu Dt 13,Aug,2024 khan a lo hrilh a tin, Independence Day lawmna AR Lammuala neihah Mizorama Kuthnathawktute thlai thar leina tur in Rs 110. Cr(Cheng Vaibelchhe za leh sawm) lai Sawrkarin a dah thu a sawi bawk a; hetianga kil hrang hranga sawiselna te ngai pawimawh a Sawhthing lei an tum dan thlak a ni ta hi hriat a nuamin a lawmawm hle a ni. Chubakah, heng Aieng, Hmarcha, Hmunphiah leh Sawhthing leina/price support atan sum tam tak a lo intiam thin anga Chief Minister Pu Lalduhoman’ a D-A-H hi thil chhinchhiah tlak tak niin ka hria. Sawhthing Grade ‘A’ chauh lei/cover tum chungchang kha ka phak tawkin ka ziak ve a, feedback tha tak tak leh zawhna mak pui pui ka dawng nual a, ka han tuihnih leh teh ang.
GRADING hrim hrim hi chu sumdawnna thilah hian a serh zinga mei ang hi a ni a, Mizoram bikah hian kuthnathawktute tharchhuah deh ralna hi kan la neih mumal loh em avangin kan hre lo mai mai a ni. Bazarah thlai hnah emaw a rah emaw i leiin zan riak tawh leh riaklo chu a man an chhiar dan a dang ngei anga tin, artui i lei pawn a pum lian tha dah khawm ho chu a pum te deuh ho ai chuan a man a to ngei ang. Grading chu a quality a zir kha a ni mai a, Sawhthing anih vanga han buai hluaina chhan tur a awm lo mahse, Sawrkarin Grade ‘A’ chauh buaipui a tum kha kan duh loh chu a ni. Sawhthing pawh hi hmun thenkhatah chuan Grading hi an lo kalpui thin, thil har pawh a ni lo; a pawimawh ber chu a chawh hunah a thlar lian thei ang berin, pem awmlo leh him taka chawh chhuah hnuah fai taka then hnuah a dahna saiip/buara ip fai taka dah/pack a; buk dik taka a leitute hnena thlen a ni mai. Tin, Grading hi Regulated Market mumal taka kan kalpui hunah te chuan A – C emaw A – A+++ ang zawngte emaw in a la kal chho ngei ang.
Sawhthing chunchangah hian kan hotute hian kuthnathawktute hi rinawmlo zawngin an la sawi fo erawh an ngaihtuah chian loh vang a ni ber awm asin, thangkhat lian dawn Pathian kaihhruaina zarah ka thawhpuite leh member-te duhsakna changin All Mizoram Farmers’ Union(AMFU) General Headquarters ah General Secretary ka lo ni ve tawh a; hemi hun chhung hian Mizoram dung leh vang bakah ram pawnte thlengin kuthnathawktute hmasawnna tur ngaihtuah hian ka lo pen ve tawh a . Mizorama Kuthnathawktute aia taima leh rinawm hi an awm biklo khawp asin, Mizoram chhung hrim hrimah pawh vawiin thlenga thil ti bo/thlauh ten an hmuh let leh zel dante hi pui tak a la ni, mi thenkhat(a tlem zawk) rinawm loh vang maia rinawmlo ta viau a in sawi hi a fuh love; NGHAHLOH DAWR la kalpui thei State kan nih te pawh hi a namai lo teh ania.
Zirmiten an sawi danin Thelret(Rubber) a sumdawnna hi kum 1880 vel khan Mizote hian vai ho nen kan lo kalpui tawh a; khang hunlaia vai ho hnen atang khan CHI hi Thelretin an thleng thin a(Barter System). Vai ho khan an CHI lo kente a buk rit nan tuiin an lo ti hnawng thin a (Vai ho an fair lo hmasa a ni), khami avang khan Mizote kha thinrimin Thelret karah Bal te, Changel bul te leh lungte kha an dah a an hlum hnan ve ta thin a ni. A hnu zel ah La a sumdawnna an kalpui te pawh khan hetiang hian vai ho in Mizote kha bum an tum hmasak zel avangin a chhan letnan an tih ang khan an ti let ve a ni. Tin, Aieng leh Sawhthingte phei chu ka lo sumdawng ve fo tawh a, Mizoram chhunga ka lakna Kuthnathawktute zingah han rinawmlo tia sawi tur hi ka tawn awm reng ka la hre lo chutihrualin, inhrilh hriat that erawh a ngai. Tin, thlai thar thawnchhuak zawnga hma kan la chho tak tak dawn a nih chuan elpui tur State tam tak kan nei tih hria ila, kuthnathawktute pawn man to uchuak taka kan tharte hralh tum kher loh tur, sumdawnna hi indona chi khat a ni tih hria in kan thluak kan hman thiam a; tanrual a ngai hle a ni.
