Vawiin khan CM Conference Hall ah Chief Minister Pu Lalduhoma hmaah Staunch Enterprise, Tinsukia, Assam leh Zawlnghak Farmer Producer Company leh Sialkal Farmer Producer Company te chuan Sawhthing Metric ton 500 leh Hmarcha Metric ton 100 leina tur inremna an ziak a. He inremna hi Clover Organic Private Limited Dedradun te buaipuina hnuaia ziah niin Pu Chinmoy Hait, Project Consultant, Project Management Unit, Ministry of Agriculture & Farmers’ Welfare, Governtment of India chuan hriatpuina a ziak a ni.
Sawhthing leh hmarcha an inleisakna tur rate hi January, 2024 ah la sawi fel tur a ni a. Loneitute tana a rate tha tur ang zela ruahmanna kalpui an tum thu Pu Sanjay Kumar, Sr. Vice President, Clover Organic Pvt. Ltd, agreement facilitator firm ni bawk chuan an sawi a ni. Zawlnghak FPC hian sawhthing leh hmarcha Mizoram loneitute tharchhuah an supply ang a, Sialkal FPC hian sawhthing chauh an supply thung ang. A leitu tur firm aiawh hian Pu Bishak Roy Chaudhury, Senior Consultant, Ernst & Young chuan inremna hi a ziak a ni.
Vawiina inremna ziah hi Supplier Company pahnih leh Buyer Company pakhatte, facilitator nei leh Ministry of Agriculture & Farmer Welfare aiawhte hriatpuinaa inremna a ni.
Pu Lalduhoma chuan, sawrkar policy pawimawh ber pakhat thlai thartuten man man taka an thlai an hralh theihna tura hma latu company te chungah lawmthu a sawi a. An inremna anga tha taka insumdawn tawnna an kalpui theih nan duhsakna a hlan a ni.
