Vawiin June ni 2, 2023 (Zirtawpni) hian Golden Hall, Congress Bhawan-ah Friday Political Session neih a ni a. He hunah hian Lalrammawia, Ramhlun South chuan ‘Zoram Hmathlir’ tih thupuia hmangin thu a sawi a. MPCC President Lalsawta’n thu a sawi bawk.
Lalsawta chuan, “Inthlana sum chakna hi Congress Party chuan ‘DAH NIL’ kan tum. Inthlana sum chakna thah chungchangah hian a duhthusam a sawi mai mai a ni min ti maithei, mahse, ka duhthusam hi Mizoram tan a that avang leh kan ti thei tih ka hriat avangin sawi ka ni. Kan thenawm state-ahte chuan MLA a ding turin cheng nuai 400/500 neih a ngai tawh. Chutiang ang ramah chuan Mizoram hi siam kan tum lo. Inthlana sum chakna hi tih tawp kan tum a nih chuan tun hi tih tawp hun a ni. Pawisa a lei theih anga min ngaitute hian min hmusit tihna a ni. Hawh u, min hmusittute hi i ti zak ang u. ‘Hausak tum Politiciante hi kan mamawh lo che u’ tiin min lei tumtute hi i hnawl ang u,” a ti.
Lalsawta chuan, “Sakhaw tih bik nei lote i tangrual ang u. Kohhran, NGO leh Political Party hrang hrangte pawh kan hnam leh kan Sakhua himna atana tangho turin ka sawm che u a ni. India ram zau zawk leh Manipur boruak kan ngaihtuah hian thut mai mai a theih tawh lo. Sakhaw zalenna a awm theih nan kan tanrual a ngai a ni. Mizorama sorkar mek MNF hian NDA huangchhungah BJP an thawhpui a, ZPM pawh hi BJP nen in thawk dun ti ila an haw viau ang, mahse BJP hi an haw tak tak si lo a ni. Congress Party chuan sakhaw zalenna kan duh a, sakhaw tih bik nei Party reng reng kan thawhpui ve thei lo” a ti.
Political Session-a Speaker tura sawm Lalrammawia chuan, “Danglamna hi kan sorkar hunah ni lovin tunah mipuiin an hmu tur a ni. Rorelna chan hun chauha danglam in tum a nih chuan a dik lo ang. Tuna in awm dan hi rorelna in chan huna in hlimthla tur a ni,” a ti a. “RTI hman kher ngai lo a sorkar langtlang siam ngam kan mamawh. Kan sakhuana nen ram kaihhruaina hi a kal kawp tur a ni a. In tih theih ngei tur hi sawi thin rawh u, hei hi Party dangin thusawia min sawm pawhin ka sawi a, ka ti ang kan tih chu kan ti ngei tur a ni. Vawiinah hian Congress Party hi danglam tum takin in kal tih ka hmu a, a lawmawm ka ti. Party dangte pawh hian danglam tum zel se a tha. Chumi khami chu candidate atan sawm rawh u, chhung leh khat an ngah tih mai mai, chhawm nei ho kha kan ramin a mamawh chuang lo. Party-ah ka senior tawh tih vang mai maia candidate nih tumte pawh an awm thin. Kan ram tan eng nge an tih theih, eng ang rilru nge an put tih hi candidate tehna atan kan hmang zawk tur a ni,” a ti bawk.
Political session hi Dr. Henry Zodinliana, President, AIPC-in a kaihruai a, Dr. Lallianchhunga, Chairman, Media Department-in Guest Speaker chanchin a sawi bakah C. Lalhriatpuia, Secretary, Media Department-in report a pe a. Lalbiakhluni Colney-in zaiin mipui a awi bawk.
