Provisional Employees’ Association of Mizoram, PHED Branch chuan vawiin khan an General Assembly vawi 1-na Multipurpose Cultural Complex, Berawtlang-ah an hmang a. Deputy Chief Minister Tawnluia chu khuallian a ni.
Khuallian Tawnluia chuan kan hnathawktute ngaihtuahtu DP&AR in thahnem ngai taka ram tana thawktu, a lian ber atanga te ber thleng ngaihtuahna seng Department changtu a nihna angin vawiin a sawm a nih chu lawmawm a ni a ti a. Sawrkar hnathawktute a lian ber atanga te ber thlengin kanin kam ki vek a, pawimawhlo tumah kan awmlo tih hria ila, hman lai deuh atanga a kalphung mumal lutuk lo a sawrkar hnathawk Muster Roll kan tih thin kha tun sawrkar hmalakna in Provisional Employee ti a vuahin kaldan thar leh mumal zawk duan a ni ta a ni a ti a.
Khuallian chuan kan hun tha zawng zawng sawrkar tana hmangten sawrkarah regularisation an nih theihnan dan thar hrang hrang, post vacancy a awm a an ngheh theihnan dan thar hrang hrang- kum 7 hnu a, vacant post a awm a seniority behchhana regular theihna dan te, regular te hlawhzat atanga 50% fix pek te, Casual leave chungchangte, regular post sawrkarin a lak apiang a provisional employees tan 35% reservation te, kum khat ah hlawh 4% increment te leh thildangte duanchhuah thar a nih thu a sawi a. Pu Tawnluia chuan sawrkarin chutiang taka a hnathawkte a ngaihsak angin thawktute chu an kut a hna tla zawng zawng chu hun bi nei leh thahnem ngai taka thawk zel turin a chah a ni. Tui enkawltu bik kan nihna ah kan mawh a sang hle a, rinawmna leh inpekna nena mipuite rawngbawl zel turin a sawm bawk a ni.
Tun dinhmunah Provisional Employees PHED ah tam berin mi 2010 an awm mek a. Vawiin General Assembly-ah hian District hrang hrang atangin chhimtu an kal a ni.
