Congress thalai (MPYCC) chuan Mizorama Sorkar kan hrawn mek hnuaiah, sualna pung zual nasa em em mai chu hriatthiam harsa a ti takzet a. Ruling party mi lehsa te in luling luttuk te, zu leh ruihlo a hluar luttuk leh dan lo va thiltite zalenna rama Mizoram a siam nasa lutuk hi a vanduai thlak kan ti a, Law and Order kenkawh chungchangah MNF Sorkar a fail nasat zia nitin atakin kan hmu a, Hetih laia Home Minister ber ram mipui thlamuan tur tak ngial pawha in lan ngai loa, a tawm bo reng hi Mizoram mipui dinhmun him lova dah a pawisak loh zia a tichiang hle a, Home Minister hi a tawm bona atanga lo chhuak turin kan au a ni.
MPYCC chuan, Mizoram mipuite hriat tura hmun hrang hranga rulling party mi leh sa block leh unit hruaitute in luling lutukin Director leh Secretary office chhuahsan tawhte pawh ko let leh ngam khawpa an che a, officer leh sorkar hnathawkte zahpah lo taka an tawng khuma transfer-a in vau thawm hriattur awm reng te hi pawi kan tiin Mizoram hun kal leh zel tur atan tha kan ti lo takzet a ni. Rulling party mi leh sa te mai nilo, mipui thlan ruling MLA te meuhin PWD officer-te rikrap nana silai a hmet puak tih thawm hriat tur a awm te, Sub- Headquarters YMA hruaitute transfer-ah an vau thawm te, ruling MLA faten YMA Branch pakhat hruaitute kut an thlak thawm awmte mai bakah tunhnai Chief Minister fanu nia an sawiin Doctor pakhat zahpahna awm hlek lova a rikrap leh tawngkhum lai video social media lama a dar leh chuai chuai mai hmuh tur a awm hi MNF sorkar hnuaia Mizoram mipui te kan zalen loh zia leh dan leh thupek kenkawh kawnga an hlawhchham zia a chiang hle-ah MPYCC chuan a ngai a ni.
Kumin January atanga July thla chhung Aizawl District Crime Report-a an tarlan danin, police ten thubuai 1,294 an ziak lut tawh a, thubuai kal mek 844 awmin, nikum 2021 kum chanve chhunga thubuai ziah luh zat aiin kumin 2022 hian thubuai ziah luh 151 zetin a tam tawh zawk. Thubuai 1,294 ziah luh atanga 844 chu chin fell oh niin police ten an la buaipui mek a. Kumin 2022 kum chanve chhunga thubuai ziah luh 1,294 zinga 919 (71.09%) chu rukruk thubuai niin, kum 2021 chhunga thubuai ziah luh zat 1,143 atanga 630 (55.12%) chu rukruk thubuai bawk a ni. Aizawl District Crime Report chauh en pawh hian MNF sorkar hnuaiah Mizoram-ah sualna a pung nasa tih a lang chiang hle.
Tun dinhmunah Mizoram hmun hrang hranga zu leh ruihhlo, a bikin Heroin No.4 tawlhruk nasa takin a hluar a. Excise & Narcotics Department leh Police-ten an in man tam siak ta em ni tih mai tur khawp a, nitin maia ruihhlo man thu chanchinthar lama chhiar tur leh hmuh tur a awm reng hi a rapthlak hle a. Dan kengkawhtu sorkar berin a tih tur a tih loh vang leh a tlin ngang loh vangah MPYCC chuan kan ngai a. Zu leh ruihhlo do kawnga Home Minister berin YMA te hial che chhuak tura a beiseina thawm hriat tur a lo awm ta mai hi MNF sorkar rintlak loh zia leh mipuite himna tura innghah ngamna an nih loh zia a chiang hle a ni.
Tuna Mizoram dinhmun hi thuneitu leh a huai huai te dinchanna ram, Kristianna in min tih en hma hmanlai mi lulak hun lai dinhmunah min chhuahpui lek lek tawh hialah kan ngai a, pawi kan tiin, lungchhiat thlak kan ti takzet. Heti tak maia Crime rate a sang chho leh thil rapthlak tak tak a thleng-ah sorkar atanga hmalakna mumal tak hriat tur a awm lo leh pawi khawihna rapthlak tak tak thleng chhui chhuah hleih theih loh a awm reng mai te, MNF sorkar dan leh thupek ken kawh kawnga a hlawhchham zia chiang taka ti lang tu a ni a, in enfiah nachang hre tur leh a bik takin Home Minister zahawm tak Pu Lalchamliana chu tawm bo reng ringawt loa, Home Minister ni tura thutiam a lak tum-a a inthuam dan kha Mizoram mipuiin kan mithla reng tih hria sela, Mizoram tan a puanven sawichhing thar leh turin MPYCC chuan kan ngen tak meuh a ni.
Tuna Mizoram dinhmun eng kawng zawng pawha him lo leh tha lo takah hian Mizoram mipuite an thla a bar a. Sorkar kal ta Congress hunlaiah khan Mizoram mipui an thla a muang a, an hlima an himna hunk ha an ngai takzet tawh a. Pu Lalsawta hruaina hnuaiah Mizoram leh Mizoram mipuite tan bungthar, sorkar viak tha, dan lalna ram, Mizoram mipuite thlamuang tak leh hmalam hun hlim taka an panna tur ‘Good Governance (That Loh Theih Lohna Bawm) din turin Mizoram mipui kan sawm tak meuh che u a ni.
