MPCC Treasurer Dr.Lalmalsawma Nghaka chuan, “April ni 1 atang khan Mizoram sawrkar chuan Mizoram Universal Health Care Scheme, pawisa pe lova (Cashless) Damdawiin-a inenkawl theihna chu a kalpui tan ta a, he Scheme hi Chief Minister in March ni 19 khan a hawng a. He Scheme hi scheme tha tak mai, mi harsa zawkte tan phei chuan a aia tha a awm chuang lovang tih tur a ni. Amaherawhchu, sawrkar hian hetiang scheme tha tak kalpui a tum danah hi a fuh lo hle in kan hria a ni.,” a ti.
Dr.Lalmalsawma Nghaka chuan vawiin khan Aizawl Press Club-ah chanchinthar lakhawmtute kawmin, “MUHCS hi tunah hian sawrkar Hospital ah leh Private Hospital thenkhatah chauh kalpui a ni a. Mizorama damdawiin lian pahnih ZMC&H leh Civil Hospital te hian min dawl zawh dawn loh avangin Private Hospital te tel lo chuan he scheme tha tak hi a hlawhtling dawn lo tih a chiang a. Private Hospital neitute thuchhuah leh TV vela an kawmna atangin sawrkar hian an duh ang barhluih tumin hma a la a ni awm a, hei hi a serious hle. Private Hospital neitute vauna tawngkam te pawh sawrkar lam atangin a chhuak a ni awm a, hei hi a pawi hle.
“Sawrkar hian he MUHCS hlawhtlin nan hian Private Hospital te a mamawh avangin inbiakna neih pui in a rate leh bill pek dan tur bakah security sawrkarin a pek theih tur thlengin an sawiho in an inrem tur a nih laiin ZPM sawrkar hian an duh anga engkim kalpui in zawm turin a nawr lui niin a lang a, hei hi thil nihphung tur a ni lo. Private Hospital te tan pawh pawm theih chi niin a lang lo ni.
“He scheme kaihnawiha pawimawh em em Private Hospital te nen hian Scheme kalpui anih hma in awmze neia inbia in inremna an lo nei lawk vek tur anih laiin ZPM sawrkar chuan kawng bo takin he scheme tha tak hi kalpui a tum a ni. Hei hian Administration an hriat loh zia leh an thiam loh zia a lantir a ni.
“MUHCS ah hian tun thlengin mi 5000 vel chauh an la in register te hi mipui lam pawhin rinhlelhna an la nei lian hle tih a lang a, a bikin sawrkar hnathawk harsatna tawk pawh an awm nual tawh a ni. Sawrkar damdawiin lian ZMC leh Civil Hospital ah khum chan har bawk si a, emergency tak taka inzai ngai te, a nau vei te an awm a, Private Hospital an pan Ioh theih loh hun a lo awm a, buaina a thleng chho mek a ni.
“Heng thil lo thlen chhan chu sawrkar ruahmanna fel Ioh vang leh kalphung hriat Ioh vang a nia, hei hi kalphung thar anih chuan mipui in an tuar nasa dawn an hriselna phei chuan a tuar hle dawn a ni.
Sawrkar hian phai lam Hospital thenkhat inremna siampui in reimburse theih turin an kalpui ni te a sawi a ni a, heng te hi a serious hle. Mizorama Private Hospital te hmelma en ti tiha an en laia phai lam Hospital te duhsak zawk anga an che te hi sawrkar hian mipui tawrhna lo thleng thei thil hi engahmah a ngai lo 2 ang hle. Phai lama inenkawlna senso kha bill leh thei pawh nise Hotel thlen man leh ei leh in, veivahna te thlengin a hautak em em a, heng te hi ngaihtuah chian a tul Sawrkar hnathawk te hlawh an cut luih sak anga lang te hi thil serious tak a ni.
“Sawrkar hnathawk te hian dan hnuaiah an hlawh ah thu an nei a, chu chu an right a ni. An hlawh cut tur chuan anmhni phalna ziak ngeia a awm a ngai a mahse tuna ZPM sawkar hian an right chu rahbeh sakin an cut luih sak mek a ni. Sawrkar hnathawk te hian an hlawh cut hi an ui hran lovang, mahse Health care system an kalpui dan fello vangin tun dinhmunah he scheme hi an duh lo a ni
“Tin, he scheme a mipuite thawh ve tur sum hi a tam hle a, chhungkaw thenkhat tan chuan a hautak hle dawn a ni. State thenkhat ah chuan a thlawn ten an ti thei a, kan ramah ngei pawh Congress sawrkar lai khan Rs. 500, Rs.750 Rs.1000 chhungkaw khatin an thawh ve a, Healthcare a chungkua inziaklut pawh chhungkua nuai chuang an ni. MUCHS ah hian mipui in an thawh ve tur, a premium hi ennawn a, mipui in an zawh tawka kalpui a tul hle. He scheme mumal lo taka kalpui a tum hi ZPM sawrkar hian ngaihtuah tha leh se, Private Hospital te nen inremna neihpui thuai thuai se, hlawhtling takin kal se tih hi kan duhdan a ni.
“Mipui tawrhna a nasa tawh si a. Sawrkar in MUCHS hi mipuiten Private Hospital hrang hrangah hman a nih theih na turin chingfel thuai rawh se. Chuti a nih loh chuan a tuartu chu khawsak harsa zawk, mipui te an ni si a ni,” a ti bawk.
