Dt. 25.10.22 khan sawrkar lehkha lem, Cyclone Sitrang avanga sawrkar pisa zawng zawng chawlhna tur thupek, Deputy Commissioner, Aizawl District hming ziah hnan anga (forged signature) siam chu WhatsApp-ah nasa taka thehdarh a ni a. He sawrkar thupek lem/phuah chawp avang hian mi tam takin hemi ni hian office khar a ni dawn emaw tiin mipui nunphung nasa takin a buai phah a ni.
Hemi chungchangah hian Isaac C.Lalrempuia, Sub-Divisional Magistrate, Aizawl District chuan Cyber Crime Police Station-ah FIR a thehlut a. Cyber Crime PS Case no 105/2022 u/s 468/505(1)(b) IPC dated 25th October, 2022 ziah luh niin a case hi chhui chhunzawm nghal a ni a. Ngun taka chhui a nih hnuah he sawrkar lehkha lem (forged document) hi Lalsangliana, Superintending Engineer (SE), PWD, ITI Venga cheng siam a ni tih chhui chhuah niin, amah hi man nghal a ni a, tunah hian anticipatory bail-in chhuah a ni.
Mizoram Police chuan Sawrkar lehkha pawimawh lem siam lo turin leh hetiang thilte thawn darh lo turin mipuite a ngen a, dan anga na taka inhrem theihna a nih avangin leh mi thenkhat pawh an lo chetchhiat fo tawhna a nih avangin hetiang thilah hian inhnamhnawih lo turin kan inngen tak meuh meuh a ni an ti.
