Vawiin ni 9, August, 2024 hian Congress Party chuan Congress Bhavan-ah ‘Friday Political Session’ an hmang a. He hunah hian Dr Lallianchhunga, General Secretary, MPCC chuan thusawiin, “Sawrkar tha dinna tura kan kawngpui hi tawpchin nei lo a ni a. Sawrkar tha atangin sawrkar tha lehzual nei tura hma la tur kan ni. Kan hruaitu thenkhat ten kan hruaitu kalta te duhkhawp lovin Tripura te, Sikim te leh state dang te hmasawnna khaikhin in ‘Kan hruaituten engmah an lo ti lo’ tiin an sawi thin a. Kei chuan kan hruaitu kalta te khan kan ram leh hnam in kan zawh tawk zelin hma min sawnpui a ni ka ti. Kan thenawm state kan sawi thinte hi a ram mipui dik tak te chimrala an awm tawhna State te a ni. Chuvangin kan ram hruaitu kalta te khan kan ram leh hnam himna hi an dah pawimawh hmasa ber thin a ni tih hi Zoram mipuite hian hria se ka ti duh a ni.
“Kan ramah hian vote base politician an tam avangin kan sawrkar hi a zan kal lek lek thin a, ZPM sawrkar pawh hi a chiri hle a ni tih kan hria a ni. Chuvangin kan ramah value-based hruaitu kan mamawh a, political party te pawn kan mamawh a ni. Mithiam te pawh ka challenge duh chu, politic hi inluhchilh ang u. Mithiam ten politic in luhchilh loh chuan mi thiamlo zawk ten ram an kaihruai a, ramin a tuar thin.
“Rorelna dik leh rorelna tha din tur chuan political party-ah hian piantharna a thlen a ngai a. Vawiiinah hian ZPM hian chutiang nilo chuan sawrkarna an chang a, engmah danglamna a thleng thei lo a nih hi. ZPM CM Adviser pakhat chuan ‘mipui phun ri kan hre lo’ a ti a, chu chuan an lal tawh zia a lantir a ni. Congress hunlai aiin tui supply a chhe zawk a, Electric supply a chhe em em a, mipui an phun luai luai laia mipui phun ri hre theilo ram hruaitu kan nei hi a pawi hle a ni. Chuvangin Congress party hi Mizorama rorel tura Pathianin hun a pek rei ber ngam in ni Pastor pakhat chuan a ti a, Congress hian chu chu kan hre reng tur a ni. ZPM sawrkar hi tunhnaia research an neihnaah mipui tam tak beiseina an pha lo hle tih a n. Thla sarih lek chhungin thil tamtak an tisual tawh a chiri takin an zan kal mek a ni.
“Kan Home Minister hian ZPM an sawrkar chuan Mizorama pung ber tur chu Pum a ni a, tuthlawh hralh a kal ber dawn a ti anih kha. Mahse tuna ZPM sawrkarah hian thil pungchak ber chu pum leh tuthlawh a ni lo, an party a mi pawimawhte appointment pek a ni.
“Kan hma lawkah AMC Corpotator Bye Election ah kan thawkdawn a. Do thuhmun kan neih avanga thawkho kan ni lova, WARD VI Corporator hun lo taka boral ta, Pu John Zosangliana Ralte hmachhawp hi a nupui, Pi Lalrinfeli (Mafeli) hian rawn chhunzawm se tih kan duh vang zawk a ni. Voter te pawhin min lo hriatsak tura kan duh chu, ZPM Candidate a tlin chuan AMC ah danglamna engmah a thleng dawn lo, AMC ah sorkar a inthlak phah dawn chuang lo. Mahse, mipui Candidate Pi Lalrinfeli (Mafeli) kan Vote tlin chuan AMC thahrui hmangin a pasal hmachhawp te a chhunzawm thei anga, a bial chhungah danglamna a thleng dawn a ni.” a ti.
AMC Ward -VI Candidate pawhin thusawi in, “Hmani lawkah ka pasal in min boral san a, ka tan chuan nimin ang chauh a ni. Kan mittui pawh a la hul lova, mahse inthlan a ngai bawk si a. Congress leh MNF lama kan hotuten ka pasal hmun ruak luah a, a hnathawh zawh loh chhunzawm tura Candidate turin min rawn sawm a, min sawmna zahawm ka tih em avangin, ka pasal boral ta Pu John Zosangliana hmunruak luah turin Candidate ka lo ni ta a, ka insit hle a ni. Ka damchhungin hetiang dinhmunah hian ka din ka ring ngai lo a, ka damchhunga ka hriat reng tur a ni. Hun lo kal zel turah erawh din chhunzawm zel ka tum lemlo a, ka ngaihtuahna ah pawh a awmlo a ni.
“Tlawmngaia ding tura min sawm angin, ni 10 vel lek hun la awmah hian theihtawp min chhuahpui turin ka swm a che u. Zam lovin i kal zel ang u, Lalpan min hruai zel anga tiin hma i la zel ang u.” a ti.
