Vawiin khan ZPM chuan political session kan nei a, Rosiamhnuna Khawlhring, Upa Committee President chuan kaihhruaiin Christina Roluahpuii, AMC Corporator chuan thu a sawi.
Christina Roluahpuii chuan, “ZPM chuan kalphung thar, mipui sawrkar tih kan tlangaupui a, mipuite pawhin min thlawp viauin a hriat. Mipuite hian kalphung hlui an ning tawh a, kan ram dinhmun an thlirin kalphung thara kal ve an chak tawh a ni. Bible-a kan hmuh angin, ‘miin in chunga an tiha in duh tur ang zelin, mi chungah pawh ti ve rawh u’ tih hi ka rilrua kalphung thar a thawh dan a ni. Chuvangin, sawrkarna kan siam hma atang hian kalphung thara kan kalpui tan a ngai a, party mi zawng zawng kan pawimawh rualin, a bik takin mipuiin an thlan chhuah corporator-te hian mawhphurhna sang tak kan nei a ni. AMC-ah corporator sawmpakua kan awm a, chung zinga paruk chu ZPM kan ni a, a bak mi sawmpakhat chu MNF niin Congress pahnih an ni bawk. Party dang corporator nena kan danglamna mipuiten an hmu lo a nih chuan kan hotute’n uar taka an tlangaupui kalphung thar mipui sawrkar hi keini corporator-te vang hian an ring zo lo palh thei a ni. Tunlai khawvelah miin thil an chik tawh a, tunhma anga thil tih mai mai a rem tawh lo. Corporator-te hian fund kan ngah lo viau, chutihrual erawh chuan kan neih chhun ang angte engtin nge kan hman tih hi mipuiin an ngaihven reng dawn. Mipuite hian ZPM corporator-te fund hman danah party dang corporator-te hman dan nena khaikhinin kalphung thar kan hmuhtir a tul tak meuh meuh a ni. MLA-te chu session-a an perfomance-te mipui thlir theih turin a awm a, kan MLA-te an che tha thin hle. Keini corporator-te chu kan fund hman dan hi mipuiin mi teh theihna pawimawh ber pakhat chu a ni. Chuvangin, hemi kawngah hian kan fimkhur a ngai viau,” a ti.
ZPM Corporator chuan, “ZPM Corporator-teah hian Aizawl mipuiin kalphung thar, mipui sawrkar an hmuh phawt chuan kan hotute tan chuan kan thil tum hi tlangaupui a nuam lehzual ang. Aizawl mipuiin kalphung thar an hmuh phawt chuan Aizawl mipui thawm hi thingtlang lama kan unaute beng pawh a thleng ngei ang. Tin, pawimawh em ema ka hriat chu mipui tana thlan chhuah kan nih ang ngeia mi te ber pawh ban phak kan nih hi a ni. Mi hnuaihnung zawk leh dinhmun chhe zawka kan ngaihte ban phakah kan awm lo ang tih hi a hlauhawm ka ti. Heng mite ban phaka kan awm phawt chuan kalphung thar mipui sawrkar tih hi kan hotute tan tlangaupui a nuam leh zual ngeiin ka ring tlat,” a ti bawk.
Christina-I chuan, “Kan hotute, MLA te leh Corporator-te hian theihtawp kan chhuah phawt chuan Pathian leh mipui zarah sawrkarna kan chang ngeiin a rinawm. Tun dinhmunah hmuh theihin kan party a thang mek a, LMC inthlanah phei chuan kan solid hial a ni. Hengte hi kan tih theih a ni lo tih hriat a, Pathian leh mipuite zar a ni tih kan chian a tul. Kan chapo hun hun chu hnuhhniama kan awm hun turah ka ngai. Inngaitlawm tak chungin, Pathian hre reng a theihtawp kan chhuah phawt chuan ZPM hian hma a sawn zel ang. Eng pawh ti dawn ila, kan au hla kalphung thar, mipui sawrkar tih hi kan rilruah kan dah tlat a pawimawh,” a ti bawk.
