Aizawl, 21st March, 2022 : Vawiin khan State bank of India chuan, Corporate Social Responsibility hnuaiah ICU khum 50 (sawmnga) Mizoram sorkar hnenah an hlan. He inhlanna inkhawm hi Chief Secretary Dr Renu Sharma pisa ah neih niin, SBI aiawhin Pu Lunkim Thangboi, General Manager chuan Pi Renu Sharma, Chief Secretary, Government of Mizoram hnenah a hlan a ni. Heng ICU khum te hi, United Company siam niin, pakhat man hi Rs 72,379/- a ni.
Chief Secretary Dr Renu Sharma chuan SBI chungah lawmthu sawiin, Sorkar in hripui dona kawnga hma a laknaah Public Sector leh Private sector te nen tang tlang a, kan theihna ang anga hripui kan do tlang hi a lawmawm takzet a, mihring mihrinnaa inhmangaihna kan lantir hi a ropuiin, nun ho a nawm phah hle a ni, a ti.
General Manager, SBI Pu Lunkim Thangboi chuan, COVID hripui len hnuah, SBI hian hri dona kawng a tangkai tur thil engemaw zah an pek tawh thu sawiin, Aizawl ah leh district headquarter hrang hrang Lunglei, Lawngtlai leh Siaha ah te PPE full Kit 1600, Ventilator 10, Serchhip Hospital tan Ambulance, ZMC hnenah SBI Mizoram Employees te thawhkhawma lei Morgue Van te, Aizawl khaw chhunga veng hrang hrang 4 hnenah Oxygen Concentrator te an pek tawh thu a sawi a, hengte hian a petu te rilru in a tum ang ngeiin mipuite harsatna sutkian nana tangkai a nih a, mihring nunna hlu tak chhan nana tangkai an nih a beisei tlat thu a sawi a ni.
