State Bank of India (SBI) chuan corporate social responsibility a\angin vawiin tlai khan Association for Voluntary Blood Donation (AVBD) hnenah thisen peknaa hman tur hmanrua leh bungrua chi hrang hrang Rs 2,51,000 hù an hlan.
Bungrua inhlanna inkhawm hi Civil Hospital, Aizawl Medical Superintendent office kawtah buatsaih a ni a, Health and Family Welfare Board Vice Chairman Dr ZR Thiamsanga’n a hmanpui. Hmanruate chu SBI Regional Manager LP Lalchangkima’n AVBD president C Lalnunnema hnenah a hlân a ni.
Health and Family Welfare Board Vice Chairman Dr ZR Thiamsanga chuan, AVBD hmalakna leh inpekna chu ropui a tih thu sawiin, “Mahni hna kalsanin in thawk a, Mizoramin Covid-19 vanga hun harsa tak a tawh laiin thisen pe turte kan tlâkchham laiin rim tak leh taima takin in thawk a, nunna tam tak in chhanhim a ni,” a ti.
Dr ZR Thiamsanga chuan, AVBD chungah sorkar aiawhin lawmthu a sawi tih sawiin, “In thawhrimna avangin sorkar pawh a mualpho lo a ni,” a ti a; SBI chungah lawmthu sawiin, an inpekna fakawm a tih thu leh nunna chhanhimtu an nia a hriat thu a sawi a, thisen pe \hintute zawng zawng chungah lawmthu a sawi bawk.
SBI Regional Manager LP Lalchangkima chuan, SBI-in an theih ang angin Covid-19 dona atan bungrua an pe \hin tih a sawi a, “Tunah pawh hian kan la kalpui zel a, ICU khum pawh 50 kan chah a, tunah hian a rawn thleng tawh,” a ti.
Inkhawm kaihruaitu AVBD President C Lalnunnema chuan, thisen pek huaihawt chánga hmanraw mamawh chi hrang hrang SBI-in an pek avangin an lawm thu leh, thisen peka mutna tur khum (folding bed) pawh SBI-in la pek leh an tum thu a sawi a; Civil Hospital Deputy Medical Superindenent Dr Thanchungnunga’n thu a sawi bawk.
SBI-in AVBD hnena an pekte chu – digital Blood pressure monitor 15, inbukna (weighing scale) 10, mattress 30, lukham 30, bedsheet leh lukham káwr 30 ve ve, plastic chair leh steel almirah pakhat a ni.
SBI hian CSR a\angin damdawi-in leh pawl hrang hrang hnenah Covid-19 dona atan ventilator 15, ambulance, morque van, oxygen concentrator leh PPE \hahnem tak an lo pe tawh bawk.
