Indian Youth Congress (IYC) New Delhi remruatna angina vawiin chhun khan MPYCC te chuan State Bank of India Main Branch kawtah tunhnaia India sawrkarin Adani Group hnenahSBI leh LIC te sum a peipun luih tir duhloh lantirna hun an hmang.
Central BJP sawrkarin a sangawizawnpui Gujarat-a sumdawng mi hausa Gautam Adani-a company te u chuak taka thang anga an lan theih nan leh, stock market-a an share te an man tur aia a let za tela a san theih nan State Bank of India (SBI) leh Life Insuarance Corporation of India (LIC) te Adani company-ah te a invest luih tir hi a dem awm MPYCC chuan an ti a.
MPYCC chuan “Khawvela investment research firm rinhlawh ber te zinga mi Hindenberg Research chuan Adani Company inrelbawl danah thil dik lo nasa tak leh inbumna ni ngeia ngaih chu January 24, 2023 khan thuchhuah an rawn siam hial a ni. Hemi hnu atang hian Adani Company share te chu nasa takin an tlahniam a, LIC Policy latu mi vbc 39 ten cheng vbc 33,060 vel an hlauh tawh a ngaih a ni a. Hemi bakah State Bank of India leh Nationalised Bank hrang hrang Adani Company-in Cheng vbc 80000 vel zet a puk pawh hi chan thei dinhmunah an awm mek a ni,” an ti bawk.
