School Education Complex leh MBSE Regional Office a hawng

Aizawl July 9 : Chief Minister Zoramthanga chuan Lungleiah Ministry of Development of North Eastern Region (DoNER) hnuaia Non-lapsable Central Pool of Resources (NLCPR) kaltlanga cheng nuai1040 senga ruahman School Education Complex leh MBSE Regional Office, Lunglei te a hawng.
Vawiina hawnna inkhawm neih ah Chief Minister Zoramthanga chuan zirna hmasawnna ruhrel liantham leh changtlung tak School Education Complex leh MBSE Regional Office, Lunglei chu Mizoram mipuite tan malsawmna ropui tak a ni tiin zirna leh khawtlangah hmasawnna nasa tak thlentu anih ngei a beisei thu a sawi a. Ram leh hnam hmasawnna leh zirna chu kalkawp tlat an nih thu sawiin zirna chu kan eizawnna leh hnathawhna mai bakah khua leh tui tha, mi pangngai a min siam tu a ni a, Pathian ropui zia tarlan nan leh amah chawimawi nan kan hman thiam a tul a ni, a ti bawk. Zirna hmasawnna ruhrel thar te hi neitu rilru pu a, duat taka enkawl turin mipuite a sawmin a chah bawk a ni.
He huna khualzahawm School Education Minister Lalchhandama Ralte chuan kan ram leh hnam dinchhuahna chu zirna ah a in nghat tlat a ni tiin School Education Department thawktute leh zirtirtu kalkhawmte chu theihtawp chhuaha hmalak pui zelah a sawm a. School Education Complex leh MBSE Regional Office, Lunglei bultana hma lo la tu Pu Joseph Lalhimpuia hmalakna leh thahnemngaihna avangin lawmthu a sawi bawk a ni.
Lunglei School Education Complex leh MBSE Regional Office Building te hi Ministry of Development of North Eastern Region (DoNER) hnuaia Non-lapsable Central Pool of Resources (NLCPR) kaltlanga a zavaia cheng nuai-1040 senga ruahman a ni. Heng building pahnih sak hnathawktu hi LB Associates, Bungkawn, Aizawl niin 14/08/2018 ah hna thawh bultan niin 28/01/2022 ah zawhfel a ni a. School Education Complex hi nuai 800 senga sak niin chhawng sarih a ni a. MBSE Regional Office building hi cheng nuai 240 senga sak niin chhawng 4 a ni.