2008 Mizoram Govt. Lumpsum Aided Higher Secondary School Association (MIGLAHSSA) chuan nimin lama ‘No Teaching Day’ an hman hnuah sawrkar atanga thu lawmawm an dawn loh avangin vawiin August ni 29 atang hian tiam chin awm lovin an school 9 te an khar tan a ni.
MIGLAHSSA chuan, “Kum 2018 MLA inthlan dawna Adhoc ngiata movement na tak – Ni 41 school khar, road block leh khaw chhunga sawrkhar office-te kan khar hnuah Aizawla kawng zawh tura kan inruahman laiin tuna kan ram hruaitute hian an tlin phawt chuan an tih ngei tur thu min hrilh a.
“Sawrkhar thar a pian veleh kan Chief Minister zahawm tak pawh hmuh nghal niin inthlan hmaa kan boruak leh a ministry hnuaia beiseina sang tak kan neih thu te kan sawi a. Kan thil ngiat Adhoc Grant-in-Aid pawh remchang hmasa bera min tihsak tura ngen nawn leh niin lawm takin kan inbia a ni.
“Hemi hnu hian kan Education Minister zahawm tak pawh MIGLAHSSA leh school mal Managing Board, party hruaitu ten vawi tam tak hmuh a ni a, beiseina sang tak nen kan Adhoc hun thlirin kan haw thin. Mahse, hun tepter tawh takah school upgradation kalpui an nih dawn tak tak meuh chuan sawrkhar sum harsatzia leh sumin min daih ve tak loh thu hriat a ni leh si a.
“Kan sawrkhar hian sum an harsat thu an sawi chu kan hre thin; mahse, sawrkhar aiin kum 20 zet school lo hahpui tawhtu thingtlang khaw mipuite hi kan rethei zawk tih hi kan sawrkhar pawh hian min hriatpui ve se kan duh a ni.
“Khawtlangin kan mamawhna a san em avangin kan sawrkhar chak tak pawh hian min tiam tawh angin Adhoc Grant-in-Aid tura a ngaihna min zawnpui theih kan ring tlat a ni,” an ti.
