Aizawl April ni 7 : Vawiin khan MPCC chuan thuchhuah siamin, “Tunhnai a sorkar school hrang hranga zirlai an pung chu Congress Party chuan lawmawm a ti hle a. Chutih rualin, sorkar school-a zirlai an pun chhan Education Minister-in a sawi chu pawm vek tlakah kan ngai lo,” a ti.
Thuchhuahah chuan, “April 6, 2022 khan School Education Minister Pu Lalchhandama chuan sorkar school a lut an pung chu ‘mipuiin sorkara rinna an nghah vang’ niin a sawi a. Hei hi Congress Party chuan kan pawm lo a, Sorkar school-a zirlai an pun chhan dik tak zawk chu COVID-19 vanga chhungkaw tam tak economy tlakhniam vang leh kum hnih chhung zet hri leng vanga school kal mumal loh vangah kan ngai a ni.
“MNF sorkar hnu hian a nghet lo a zirtirtu engemawzat lak belh ni mah se, kalphung siamthatna engmah a awm chuang lo a. Sorkar school-te hi an tha thut chuang lo. COVID-19 vangin chhungkaw tamtakin ei leh barah harsatna an tawk nasa a, chhungkaw tam tak sum lakluh a tlakhniam nasat avangin zirna tha zawk duha fee tam tak chawia private school-a kal tir hi chhungkaw tam takin an tlin tawh lo zawk a ni. Tin, COVID-19 avangin kum hnih chhung school kal mumal a nih loh avang leh, hrileng hi a la reh fel loh avangin school khar ngai dinhmunah kan la ding leh lo ang tih sawi theih a ni lo a. Chuvangin, chhungkaw tam takin school kal mang si lo a fee chawi reng ai chuan tiin, sorkar school-ah an fate an admit mai a ni zawk. Hei hi nu leh pa engemawzat kan kawmna atanga an chhanna a ni. Chuvangin, Education Minister Pu Lalchhandama thusawi hi thu dik tawk lo a mipui hruaisual tumna leh dik lo taka hmingthat lak tumna mai a ni.
“MNF sorkar hian NABARD loan hmanga school sak thatna tur sum tam tak an ti chingpen a, sum bothlau a tam em em a. School sak that tur leh repair tur tam takah a nih dan tur ang ni lo a thawh a tam hle a ni. NABARD loan hmanga school sak thatna turah thil dik lo tam tak a awm a ni tih hi Congress Party mai ni lo, Zirlai Pawlte leh Journalist-te enfiahna atang pawhin a chiang hle a, Assembly House-ah pawh nasa taka auchhuahpui a lo ni tawh a ni. Tin, SEDP hnuaiah Advertisement pawh chhuah lovin an duhsak zawng mi za tam tak zirtirtu atan an la a, hmun thenkhatah phei chuan MNF Group Secretary hmingin zirtirtu lakna tur advertisment tihchhuah a ni hial a ni. Heng zawng zawngte hi zirna siamthatna ni lovin, zirna sawpchhiatna a ni zawk.
“Chutih rualin, data hmuh tur awm lo mah se, sorkar school-a zirlai an pung ni a sawi hi thil lawmawm takah Congress Party chuan kan ngai a, zirtirtute pawh kan lawmpui hle. COVID-19 reh hnuaah pawh sorkar school a lut zat a tlakhniam nghal mai loh nan chak zawk leh awmze nei zawka hma la turin MNF sorkar kan phut a ni,” tiin a tarlangin bawk.
