Vawiin hian Aizawl West II bial chhunga MLA fund hmanga lei puanṭhui khawl semna hun, Dinthar YMA Hall-ah hman a ni a. He hun hi Pu Lalrutkima Minister, bialtu MLA chuan a hmanpui a, puanṭhui kawl 103 a semchhuak a ni.
Pu Lalruatkima chuan thusawiin, “Sorkar hi mipuite siam a ni a, sorkarin Zoram hmasawn nan a theih tawk a chhuah mek zel a. He bial leh ram hmasawnna hi mipuite vang a ni a, min ṭawiawm ula, min finchhuah ula, min ṭawngṭaipui zel rawh u,” a ti a. Pu Ruatkima chuan sorkar flagship programme SEDP chak taka buaipui mek a nih thu a sawi a, “SEDP-ah hian in theihna zawng, intuina zawng, in thiamna zawng in lo thlang dawn a nia. SEDP hi dinchhuah pui a, hmasawn pui turin mipuite kan beisei a, a thlawna dawngah inngai lo turin kan chah a ni,” a ti bawk.
RD Minister chuan, “Kan sorkar hma boruak han thlir kirin zu zawrh avangin kan rum a, kan ṭap a, tunah chuan a lo reh ta a. Sikul ṭan hun tih tlai a ni ta a, kawngchhia avanga kan rumna a lo ziaawm ta a, gas harsa a lo reh ta a. Pathianin he sorkar hi min pe a, hmasawnna nasa tak kan hmu mek zel a ni,” a ti a. “Hripui leng a kiam ta mek a, hmasawnna chi hrang hrang a nih tur angin a ni leh dawn ta niin a lang a, a lawmawm hle a ni,” a ti bawk.
Aizawl West II bialtu MLA, “Hripui a leng chung chungin bial chhungah hmasawnna hna nasa taka kalpui mek zel a ni a. Vaivakawn aṭanga Bazar bungkawn panna kawng ṭha taka siam zawh a ni a, Vaivakawn, Dawpui Vengthar ri kawng tolawt siam zauh a ni a, Vaivakawn Zohnuai to Ropaiabawk cement inchies 9-a chhaha chhun chhuah vek a ni. Vaivakawn Zohnuai Primary School aṭanga Airport Road motor kal theiin sial pawh a ni tawh a. Sawi mai sen loh hmasawnna hna thawh a ni tawh a, thawh mek zel a ni bawk. Dinthar kawn aṭanga Tennis Court nuai 100 chuang sengin kan siam zau mek bawk a ni,” a ti.
