Vawiin ni 02.09.2022, Zirtawpni hian Mizo Hnam Runah chhung inkhawm neih a ni a, he hunah hian Pu Zoramthanga President leh Chief Minister ni bawk chuan thu a sawi a. Chief Minister chuan, “Kumin chhhung ngeiin SEDP 1st installment cheng singhnih sangnga leh 2nd installment singhnih sangnga theuhin kan sem dawn a ni. SEDP hi khawi atanga sum puk emawa sem kan ni lo a, kan budget aṭang ngeia sem kan ni,” a ti.
Opposition lamin Covid hripui leh harsatna hrang hrang kara kan awm laiin ‘SEDP sem rawh se’ an ti thin tih CM chuan sawiin, “Pathianin rem a ruat zel a, SEDP pawh tunah kan sem ta mek a ni. Tun financial year chhung hian chhungkaw sing ruk hnenah cheng sing nga theuh pek an ni dawn a. Financial year tharah cheng singnga lo dawng tawhte pek belh an an ni ang a, chumi piah lamah chuan dawng thar tur sing tel kan pek belh leh dawn bawk a ni,” a ti.
MNF President chuan, “MNF chu hun tha lo atana ruat an ni, tiin an sawi thin a, Vanduai tura ruat, Pathianin malsawmna a pek loh sorkar ang hiala sawi an awm thin a. Covid hripui leh harsatna hrang hrang kan tawh karah Pu Hawla hova kan nasat loh tur zia hriaiin Pathianin a hun takah MNF min hungchhuak a, he hun harsa atan hian MNF min lo hungchhuak a ni,” a ti a bawk.
Chief Minister chuan Covid hripui avang leh chhan hrang hrang avangin khawvelin sum harsatna a tawh mek ang Mizoram pawhin kan tawk ve mek tih a sawi a. “Sum dinhmun kan harsat lai takin Delhi-in CSS sum release vek turin State zawng zawng min ti a, vaibelchhe 600 kan release a. SEDP-ah vibelchhe 150, electric kan leina atan vaibelchhe 37, PMGSY-ah vaibelchhe 70 kan release bawk. Tun hnaiah hlawh leh thil pangai piah lamah vaibelchhe 800 dawn kan release a ni,” a ti a. “Pathianin rem a ruat a, kan ti thei zel a ni,” a ti.
Finance minister ni bawk chuan ni danga Mizoram-in a la hmuh ngai loh union budget-ah Aizawl bypass road siamna tur vaibelchhe 500 leh bamboo link road laih nan vaibelchhe 100 dah a ni chu lawmawm a tih thu a sawi a. “Aizawl bypass road hi survey neih mek zel a ni a, Sihhmui atanga Muallungthu piaha chhuak turin ruahmanna siam mek a ni. Bairabi – Mamit national highway-a puang tura kan ngenna pawh min tihhlawhtlin sak a, kawng laihna leh enkawlna man tur Mizoram sorkar kutah an dah a, a lawmawm hle a ni,” a ti bawk.
MNF president chuan opposition-te chu sorkar sawiselna tur leh hekna tur ringawt zawngah a puh a, “Mi thatna lai sawi an thiam ngang lo a, mi chhiatna lai zawng char char leh sawiselna tur ringawt zawngte hian ngeitu an ngah tulh tulh a ni. An thu thiam hi ruling beih nan chiah a tha a ni,” a ti a. MNF chu hman atan lo hruai tawhtu Pathianin a la enkawl reng tih sawiin, “Arsi hi a la engzual zel dawn a ni,” a ti.
Pu Zoramthanga chuan Congress chu Delhi lamah pawh inthlang hlei thei lo khawpin an buai tih a sawi a. “Bang si, thu ber tum bawk si Rahul Gandhi an nei a, an buai hle a ni. Mizoramah pawh hian MLA pahnih khat bak an neih a rinawm lo,” a ti a. ZPM chungchang sawiin, “Candidate tur an lo insawm tam lutuk an la buai nasa dawn chauh. Pawl lehlamin candidate an lo sawm tam tawh lutuk a, pawl leh lam zin chhuakin an sawm zung zung zel bawk si a, nomination committee ṭhu se an buai nasa khawp ang,” a ti.
