Nizan Dt 3.10.2022 khan Dawrpui Vengthar MNF Unit buatsaihin, Dawrpui Vengthar YMA Hall-ah mithar lawmluhna hun hman a ni a. He hunah hian bialtu MLA Pu Lalruatkima Minister chu khuallian a ni a. Party hrang hrang aṭangin MNF zawm thar voter 90 MNF-ah a lawmlut a ni.
Pu Lalruatkima chuan, “MNF party hian harsatna hrang hrang tawk ṭhin mah ila, India rama party hlun ber pawl a ni a. Hetiang kan nih theihna hi Pathian leh kan ram tan, kan tih tlat vang a ni. MNF party hi Pathianin mal a sawm a ni,” a ti a. “Zofa ṭhendarha awmte rorelna pakhat hnuaia kan awm theihna tura thawh hi MNF dinchhan leh innghahna a ni a. He hnam a dinchhuah a, kan ram kan hnam leh kan sakhua a him hi MNF chuan a ngai pawimawh ber zel dawn a ni,” a ti.
MNF Adviser chuan, Congress sorkar-ah zu zawrh leh thil hrang hrang avangin Zoram a rum tih a sawi a. “MNF sorkarah khua a lo var ta mek zel a. Zoram pum huapin hripui leng karah hmasawnna kalpui mek zel a ni a. Veng bil leh khaw mal hrang hrang han en pawh hian hmasawnna hna thawh a ṭhahnem hle. Ram neitute kan sorkar tlat avangin hripui leng karah pawh hma lam kan pan zel a ni,” a ti.
Pu Ruatkima chuan, “Covid hripui nuai avangin duhthusam kan thleng phak lo tih chu kan hria. Mahse, mipuite rawng kan bawlnaah mipuite leh Pathian avangin theih tawp kan chhuah mek zel a. Pathianin he sorkar hi min pe a, kan ṭha bik e, kan ti hauh lo; mahse, he sorkar hi Pathian min pek a ni,” a ti a. “Hripui, vawk hri, lirnghing, ramri buai leh hun khirha Zoram hruai chhuak turin Pathianin MNF sorkar a ruat tlat a ni. Mosia pawh a tlawm hle a, Israel mite a hruaichhuak tlat. Mizo politician zingah Pu Zoramthanga aia ṭha kan nei tlat lo. Vision neiin min hruai a, a tum ram min thlen ka ring tlat a ni,” a ti.
Pu Ruatkima chuan Congress party chungchang sawiin, “Ṭhat loh theih lohna bawmah an tihah ṭha thei reng reng lote an inkhungkhawm a. A beidawnthlak hle. India ram Politics thlir pawhin Congress-ah beisei tur a awm loh zia a lang chiang hle,” a ti a. ZPM chungchang sawiin, “Kalphung thar zuartute hian Party hming, symbol leh flag thlak bak thlak an nei lo. An party-ah hian tu ber nge thu ber pawh a hriat loh. President nge Working President nge Leader thu ber a hriat loh. Chhungkua pawh thuneitu an tam lutuk chuan kalphung a mumal thei lo angin, an party kalphung a mumal lo hle a. Party pawh mumala kalpui thei lo hian mumalin Zoram an hruai lo tawp ang tih a chiang,” a ti bawk.
MNF Adviser chuan, “Opposition hovin SEDP kan sem theih an ring lo a. Kan sem ta mek a, sum harsat lai lai, an ti leh lawi si a ni. Eng pawh nise, SEDP hi kan la sem zel ang, kan pek belh zel dawn a ni. Inthlan lehah pawh hian SEDP sem chhunzawm a, Zoram hmasawnna kalpui chhunzawm turin Pu Zorama hruai MNF sorkar a ding leh ang tih ka ring tlat a ni,” a ti bawk.
He hunah hian Pu R Thanglura, Deputy Mayor pawhin thusawiin, “He ram leh hnam tana kan rawngbawlna kawngah hian Pathian lalber rawh se,” a ti a. “He MNF party-ah hian mi tu pawh an len theihna turin kan inhawng zau tur a ni,” a ti bawk.
Lalfakzuala Chenkual Ward no XIII Councillor-in thu a sawi bawk. He hun hi Pi Vanlalzawni, Dawrpui Vengthar MNF unit President-in a kaihruai a ni.
