Congress Party Treasurer Pu Zodintluanga chuan a bial, Thorang huam chhunga khaw hrang hrang fang kual mekin MNF a beidawng, Nuai 3 dawn beisei lo ngam chhungkaw tam tak Congress Party-ah a lawmlut.
Khaw hrang hrangah te hian thu sawiin Pu Zodintluanga chuan, “Election alo hnaia MNF te chuan SEDP dawng turin chhungkaw engemawtzat an thlang a. Mi harsa zawk ten lei rem an rahna tur a Bekang leh telhawng tih te mai mai an thlan tir hian a ti beidawng hle a ni” a ti.
A bial chhung chungchang sawiin Thorang bialtu MLA chuan, “Thorang biala hmasawnna tak tak a thlen chu congress sorkar hunlai zel a ni a, Kum 1998 hmaa congress sorkar laiin Bus te service tir thin an ni a. Kum 1998 – 2008 inkarah kum 10 chhung MNF in enkawl loh in an dah a. Fur lai phei chuan eng lirthei mah a lut lo. Kum 2008 a Congress a sorkar hnuah theihtawp chhuaha hmalak nghal niin Thorang bial a kawngpui awmsa chu blacktop vek a ni a, Motor luh theih loh naah pawh motor a lut thei vek tawh a, PMGSY hmanga a hma lak chhunzawm mek zel a ni” a ti.
“Kum 2018 atanga vawiin thlengin MNF sorkarin kawngpui thuamthatna tur sum a la dah lo a. Kawng a chhe leh hle tawh a, An ngaihsak zui loh chuan tun hma ang bawk a kawng chhiah-ah a let leh theih dawn a. An lo Sorkar leh palh hlauh a nih phei chuan harsatna nasatak a thleng leh dawn ” Pu Zodintluanga chuan a ti bawk.
CLP Leader chuan “Congress sorkar-ah chuan mi harsa zawkte thleng phak Budget siam thin a ni a, MNF sorkarah chuan Kum 4 a kal hnuah pawh Lo nei tute leh Kuthnathawktute tan budgetah engmah dah a ala ni lo a , Sorkar hnathawk hlawh leh inrelbawlna bak budget ah dah a ni lo a, Minister ten hnathawh an duh chuan CM hnenah pawisa an dil angai a, Minister leh MLA nih a in ang reng ” a ti a, “Congress a sorkar chuan Budget ah mi rethei te khai chhuah na tur ruahmanna tha zawk dah leh a ni anga, that loh theih loh na bawm hmangin langtlang sorkar, sorkar tha leh sorkar dik siamin mi harsa zawk te kan khai chhuak leh dawn a ni” a ti.
Pu Zodintluanga hian vawiin khan a bial chhung Khawlek, South Khawlek leh Dengsur te a tlawh chhunzawm a ni.
