Nimin dt. 20.11.24 @ 8:00 Am khan Seling a Pi Lalhmangaihi In thiah tum chungchangah Seling All NGO leh Centre for Environment and Social Justice te chuan Seling VC House ah meeting an nei a, meeting ah hian Seling All NGO member 11 leh CESJ member 8 an kal. Meeting chuan Pi Lalhmangaihi’n a phutawk compensation a hmuh ngei nan leh a chenna tur In ngaihtuah sak tura sorkar an phut thu sawiin, lungawilohna lantir nan dar 11:00 Am ah punkhawm huaihawt an rel angin, Pi Lalhmangaihi te inbul, Seling Champhai road ah Seling mipui mi 150-200 vel chu an pungkhawm a, heta tang hian Seling Field Bul thleng mipuite hian kawngzawh in, ‘Pi Lalhmangaihi In hi thuneitu ten luahtlakin sa nghal rawh se ‘Pi Lalhmangaihi In dan lova thiattu te zawng zawng hi- Bang rawh se’, ‘Pi Lalhmangaihi hi a phu tawk compensation – pe nghal rawh se’ tiin an au rual a, Seling field bulah hian Pi Vanramchhuangi, Working Chairman, CESJ chuan thusawiin, Pu K. Lalchamreia’n tawngtaina a hman hnu ah pungkhawm te hi dar 11:50 ah Seling Field bul atang hian buaina leh harsatna awm lovin an tin darh ta a ni.
CALA (Compensation and Land Acquisition) for NH-06, Aizawl District chuan November ni 19, 2024 a Seling a in thiah chungchangah a hnuai a mi ang hian thuchhuah a siam bawk.
1) Compensation latu hming hi Pu Sawihara c/o Laltluangkimi tiin Deputy Commissioner’s Office record-ah hian tarlan a ni.
2) Competent Authority for Land Acquisition (CALA) chuan Rs.8,25,268/- zât hi Pu Sawihara hnena hlan turin a peih (ready) sa tawh a, mahse ani hian an in-hnuai (basement) chhût kim loh ni a sawiin compensation hi a la duh lo a ni. Pu Sawihara dilna angin assessment pawh lak that a ni a, Rs. 12,38,091/- in chhút chhuahsak a ni.
3) Pu Sawihara assessment leh mi dang 41 assessment tharte hi DC Office/CALA chuan NHIDCL hnenah a thawn a (vide Memo No.14011/290/2023- DC(A)/L&B/177-180 dated 28th July, 2023). DC Office-in theih tawpa a chhuahpui laiin NHIDCL hian Pu Sawihara in leh lo assessment thar leh mi dang 41 assessment te hi NHIDCL hian a lo hnâwl vek a ni (vide Memo No.NHIDCL/PMU-Seling/2023- 24/NH-06/S-D/LA/1041 dated 5th January, 2024).
4) Hetiang a nih avang hian ram neitute hian an an in leh lo an chhuahsan duh loh avangin NHIDCL hian kawng zauh hna an thawk thei lo a, an harsatna hi Empowered Committee meeting 17th October, 2024-a neihah NHIDCL hian a thlen a. Empowered Committee hian ram leh in laih chhiat ngai awm engemaw zat chu hmalak a ngaih thu leh hemi chungchang hi Arbitrator hian ching fel se a ti bawk a. Hemi bawhzui zel hian section 3E of National Highway Act, 1956 angin CALA office chuan hma a la ta a ni.
5) The National Highways Act, 1956 under section 3D/3E-in a tarlan angin sorkar hian he ramah hian thuneihna pumhlum a nei tawh a ni.
6) National Highway Project hrang hrang hi Union Minister, MoRTH, Govt. of India-in hmalak dan hi ngawrh takin state tina mite chu a bawhzui thin a. NH Project NH-54 leh NH-06-ah te hian hmun tam taka harsatna a thlen avang leh hna chak tawk loh avangin a duh khawp lo hle a ni.
7) Pu Sawihara hi vawi tam tak a in leh lo zangnadawmna pawisa chhût chhuah tawh sa chu la a, insawn chhuak tura ngen a ni tawh thin a. Arbitrator-in CALA hnena ram khawih loh tura a tihna Stay Order pawh a hlīp tawh a ni. Notice hi Pu Sawihara hnenah hian vawi hnih (2) pêk tawh a ni a (26th June, 2024 leh 27th October, 2024), chhanna hi ram neitu ațanga hmuh a ni lo.
