Serchhip Damdawiin sak natur 13 Vbc pek chhuah nghal a ni dawn – Chief Minister

Chief Minister Zoramthanga chuan Damdawi In lian sakna tur hmun P&E ram, Bukpui a mi chu tlawhin bul tanna tur atana Health Department-in sum an dil cheng vaibelchhe 13 chu pek chhuah a nih tur thu sawiin, hei hi Damdawi in thar sakna tur panna kawng leh thawktute chenna sakna tur a ni a ti.
Nimina Chief Minister in Serchhip a tlawhna ah hian Zoramthanga chuan Power Grid Corporation of India Limited chuan CSR atangin Damdawi In sakna tur hi cheng vaibelchhe 21 an rawn tum dawn a, hei hi February thla khan an rawn tichiang tawh tih a sawi bawk.
Hemi hnu hian Serchhip Auditorium-ah MNF Serchhip East Block huaihawt Public Meeting hmanpui nghalin MNF President Zoramthanga chuan Serchhip Assembly Constituency-a MNF Party atanga ding turin J. Malsawmzuala Vanchhawng MNF Gen.Hqrs.Adviser chu MNF Gen. Headquarters-in lungrual takin an pawm a, an thlang tih sawiin mipui hriatah a puang nghal a ni.
MNF President chuan ZPM kal dan chu kum 2018 inthlan hmaa an insawi dan leh inthlan hnua an awm dan a inang lo tih sawiin, Kalphung thar daih rei lo ber an ni. Inthlan a zova, party dang angin kalphung an rawn nei leh ta tho a, unit an din a, kohhran pawh unit-ah an chhiar leh thei tawh si lo a ti a. An party hotu thenkhatin ‘Nakkum Nomination Committee hun hi kan thleng pha angem aw!’ tiin hlauhthawnna an nei tawh a ni, a ti bawk.
Tun ang boruaka an kal zel chuan ZPM hian seat 10 an lâk phak a rin loh thu sawiin, an seat neih mek pawh an hum ange’m tih ngaihtuah tham a ni, a ti bawk. Pathian leh mipui zarah nakkum ah MNF hian seat 30 lak tlin ngei an tum thu sawiin, MNF President chuan ama tan bial dang en a tul lo a, East I-ah nghet takin a awm mek tih a sawi bawk.
Zoramthanga chuan Congress chu Delhi chakna eng hmang an ni a. Khulamah a burpui a tlu a, helamah a phita a rawp ral zel mai a ni. An lenna ber thin Hmarchhakah an phita a rawp ral zel a ni tih hretu te vek kan nih hi a ti bawk.
Serchhip biala MNF party aiawh a ding tur J. Malsawmzuala Vanchhawng pawhin thu sawiin thudik tluantling lo hmanga mipui thluak suk tum an tam a. Chung mite chuan awih awm takin thusawi an thiam a. MNF sorkar chhung leh Covid in kum 2 min chenchilh chhunga MNF hmalakna hi a tha em em a ni tih ka sawi duh a. UNO-in Sustainable Development Goals a siamah hian Mizoramin kan titha lawrlak a. Tehfung 17 zingah Mizoram sorkar hmalaknate hi a tha em em tih sawiin heng zawng zawng hi MNF-ten an zirchianna a ni lova, tehna rintlak tak siamtute hian MNF sorkar hmalakna hi an hmu chiang hle a ni tih a tilang a. Hei vang hian MNF sorkar hi hmasawnna kawngah a che tha em em a ni tih a tichiang a ni, a ti bawk.