Vawiin(26th Aug. 2022) chawhnu dar 1:00PM khan Joint Action Committee on Serchhip District Hospital Site ten Serchhip Press Club ah Executive Committee neiin Serchhip District Hospital Building thar sak thuai a nih theihnan Public Interest Litigation(PIL) thehluh an rel.
Serchhip District Hospital thar sakna atan hian Power Grid Corporation of India Limited in Rs.21 crores lai, Mizoram sorkar hnenah a rawn pe a, May ni 27, 2022 khan Serchhip District Hospital, khum 100 awmna tur sakna tur atan thawhhona thuthlung, Memorandum of Understanding (MoU) CM Conference Hall-ah, Chief Minister Pu Zoramthanga hovin ziah a lo ni tawh a. He MoU ziahnaah hian CM bakah Power Grid Corporation of India Limited te, Health & Family Welfare Department, Government of Mizoram leh Deputy Commissioner, Serchhip District-te an tel a ni.
He 100 bedded Serchhip District Hospital hi Power Grid Corporation of India Limited chuan an Corporate Social Responsibility Fund atangin cheng nuai 2100 in an sak tura ruahman a ni a. Thla 24 chhunga sak zawh tura ruahman a ni. RCC building niin chawng ruk a sak tur a ni a. Medicine, Paediatrics, Gynaecology and Obstetrics, Orthopaedics, Ophthalmology, ENT, Dental leh General Surgery te awm tura duan a ni. Department of Health & Family Welfare chu Implementing Authority a ni ang a, enzui hna (Supervision and Monitoring works) chu Deputy Commissioner, Serchhip District kuta dah a ni ang.
Serchhip District Hospital thar sakna tur atan hian Serchhip Dist. NGO Co-Ordination Comtt. chuan Bukpui ram an rawt a, hemi atan hian District thuneitute pawhin ruahmanna thui tak an kalpui hman a, mahse NGO Co Ordination Comtt. lamin a ram chungchangah tihfel ngai te an tihfel lawk loh avangin Hospital dinna hmun ngaia sak turin Detailed Project Report (DPR) siam a ni a, chumi tur chuan Power Grid Corporation of India Limited hnen atangin Rs.21 crores hmuh a ni ta a ni.
Hetianga a hmun ngaia sak tura sum dil leh pek an nih hnu hian Serchhip Dist. NGO Co-Ordination Comtt. te chuan Bukpuia sak a nih theihnan hma an la thar ve leh ta a, chu chu duh lovin Serchhip a mithahnemngai kalkhawm te chuan Joint Action Committee on Serchhip District Hospital Site an din veleh ta a, chu chuan VC ah te, YMA, MUP leh MHIP Branch hrang hrangah te Seal leh Signature hmanga an ngaihdan la in a hmun ngaia sak duhtu an tam zawk thu Aug. ni 16, 2022 Tue. chawhma dar 11:15am khan Chief Minister Pu Zoramthanga hnenah, a Office a kalchilhin an lo hlan tawh nghe nghe a ni.
May ni 27, 2022 daih a MoU ziah tawh, vawiin thlenga hmalakna a la awm loh chungchangah hian Joint Action Committee on Serchhip District Hospital Site te chuan Serchhip District Hospital Building thar sak thuai a nih theihna tur leh a hmun ngaia sakna tura DPR siam leh sum pawh dilchhuah a nih ang ngeia Bukpui rama sa lova, a hmun ngaia sak a nih leh ngei theihnan PIL file mai an rel ta a ni.
Vawiina Joint Action Committee on Serchhip District Hospital Site Meeting hian Bukpui a Hospital thar sak a nih theihnana hma latu Serchhip Dist. NGO Co-Ordination Comtt. te chu karleh thawhtan Aug. ni 29, 2022 tlai dar 3:00pm khian Serchhip Press Club a inbiak puiah sawm an rel a, a tuk Aug. ni 30, 2022 Tue. chhun dar 12:00noon khian Press Conference kova Serchhip mipui hnenah thil awmzia puanzar a, chumi hnu ah Health Minister hmuh leh nise tih an rel bawk.
