Serchhip tualthahna Lungleng khawtlangin dem

Aizawl June 2 : Lungleng I Village Council leh NGO hruaitute thukhawm chuan 29.05.2022 (Pathianni) chawhnu lama Pi Rosangzuali tualthihna chungchang ngun takin a ngaihtuah a. Tualthattu hian danin a phut ang hremna na thei ang ber a hmuh ngei theih nan thuneituten chak takin hma la turin an ngen.
Lungleng I Village Council leh NGO hruaitute thuchhuah tarlan danin, Pi Rosangzuali, (d/o Kapliana, Lungleng I) a pasal, Zobiaksanga (s/o P.C.Vanlalawia, Serchhip – Dinthar Veng ) kut tuara a tualthihna hi kan dem takzet a. Rapthlak kan tiin hetiang nunrawnna thil thleng hi hriatthiam har kan ti a. Tualthattu hian danin a phut ang hremna na thei ang ber a hmuh ngei theih nan thuneituten chak takin hma la rawh se an ti a; He tualthihna avang hian eng buaina dang mah thleng zui lo se; Media lamah pawh thu belh chian dawl lo leh mi rilru a tha lo zawnga hruai thei thil engmah chhuah loh ni sela. Mi pakhat thil sual tih avanga tisual ve lo mi dang dem emaw, mawi lo taka tawng khum emaw hi tha kan ti lo a, chutiang thil chu engmah thleng suh se an ti a.
Tun hnuah mahni kawppuite chunga kut thlak emaw, rawng taka inthahna emaw hi thleng tawh lo se, an ti a. He tualthihna atang hian mipate hi hmeichhe awm nem zawkte venghimtu leh thlamuantu ni thei zel turin Zoram mipuite an inngen thar duh tih an tarlang bawk a ni. He an thuchhuah ah hian pawl hrang hrang aiawhten an hming an ziahhnan theuh a ni.