Vawiin ni 13 May, 2025 (Thawhlehni) chawhnu dar 1 khan MZP General Headquarters Extended Office Bearer meeting, MZP Pisapui-ah an thukhawm a. Sericulture Department hnuaia Sericulture Demonstrator post 4 hawhkhat tura hna lak chungchang an sawiho a ni.
MZP chuan Sericulture Demonstrator post 4 hna lakah thil felhlel a awm ngeiin an hria a, mi ṭhenkhat ten Examination Hall-ah mobile phone keng lutin Paper-I (English leh G.K) hi entawn an awm ngeiin a hria a. Hetianga hnalak diklo hi exam beitu thenkhat ten complain mahse kaltlangpui luih a ni a. Hetianga dik lo taka hnalak hi chhui chiang vat turin Sericulture Department hotute MZP chuan an ngen a. Ni 21 May, 2025 (Nilaini) ral hma ngeia hnalak dan chhuichiang tur Inquiry Committee din turin sawrkar an ngen nghal a ni.
MZP chuan he hnalak hi, Mizoram Direct Recruitment (Conduct of Examination) Guidelines 2018; Sl. No. 24- Instruction to Candidate; Sl. No. 27- Dutes of Invigilator te nen inkalhah a ngai bawk.
Sericulture Department hnuaia thawk tur Sericulture Demonstrator post 4 hi ni 17 February, 2025 khan Advertisement tihchhuah niin, Level 4 pax matrix a ni a. Mi 41 te dilna pawm niin, mi 14 te reject an ni. Mi 38 ten ni 8-9 April, 2025 chhung khan exam beiin, mi 32 te chu ni 7 May, 2025 khan Personal interview tura koh an ni a. Heng mite atangin mi 4 te chu thlan chhuah an ni a. Ni 8 May, 2025 khan appointment pek fel an ni.
MZP chuan hetiang thil sawi tur a awm fo chu pawi a ti takzet a. Zirlai hna zawng mekte thalvang hauhin hma a la zel dawn a ni.
