Vawiin November 7, 2022 hian PC Party President Vanlalruata chuan an Party Office Treasury Square- ah Mizoram sorkarin Serlui ‘B’ Small Hydel Project a ngaihsak lo leh political party dangin Hydel Project siam an ngaihsak lo pawi a tih thu Mizoram Journalist te hmaah a sawi.
Vanlalruata chuan November 2, 2022-a Serlui ‘B’ Small Hydel Project leh Bairabi Dam Project te party hruaitu dangte nen a hmuna an tlawh thu te, Serlui ‘B’-a khawl 3 zinga 1 a chhiat deuh reng thu te, tuikhuaha tui a khah loh thu te, a hmuna thawktu te a nghet lo an nih deuh ber thu te, building leh infrastructure dang chei ṭhat ngai a tam zia te a sawi a. “Serlui ‘B’ hi megawatt 12 siam theihna niin khawl pathum, megawatt 4 zel pe chhuak thei a ni a. Khawl pakhat hi chhe deuh rengin khawl 2 deuh char char hman a ni a. Khawl chhia hi siamṭhat ni se tun aiin power kan hnianghnar thei,” a ti a. “Fur ruahtui tlak nasat hle lai pawha a khat thei lo leh tunah pawh tuikhuah a khat lo nasa hian enchian ngai a awm zia a tarlang a; a hmuna thawktute hi ngaihsak leh dinhmun ṭha zawka hlan an ṭul hle a ni,” ti bawkin heng hi sorkarin a ngaihsak tawk loh vang a nih thu sawiin, “Mizoram sorkar hian ngaihtuahna tak tak hmang a Serlui ‘B’ hi a enkawl a ngai a ni,” a ti.
Bairabi Dam Project chungchang sawiin, “He project hi Mizorama power project lian tham kan neih zinga kan state pual liau liau awm chhun a ni a. Chumai ni lovin Forest Clearance leh Environment Clearance kan neihna awm chhun, a hmuna hma lak tawh, ruahmanna hmunah tui a khuah ngam tih finfiah tawh awm chhun a ni a. Pawisa a awm anih a hna thawh ṭan nghal theih awmchhun a nih avangin kawlphethaa kan indaihlohna phuhru tura bawhzui a ngai a ni,” a ti a. He project kalpui tur hian sorkarin a duh phawt chuan state budget atanga hma lak theih anih zia sawiin, “NLUP te, SEDP te atana an sum dah zat aia tlem dah maiin a khuah theih reng a ni,” a ti bawk.
Sorkar leh sorkar siam tum chuan thutak ngaihtuah a ṭul a tih thu sawiin Vanlalruata chuan, “Power siamchhuah lama hmalak a ṭul zia party tinin kan sawi ṭheuh laia hna bul ṭan theih Bairabi Dam Project in ngaihsak a hlawh lo hi a na ka ti a. Pu Lal Thanhawla kaihhruai Congress party leh Pu Zoramthanga kaihhruai MNF party in an tihhlawhtlin duh loh zia hriain hei hi mipuiin na kan ti a. Six Basic Needs leh Pu Ṭhena policy tihpuitlin tum anga insawi ZPM party in an policy an tlangzarh a Bairabi Dam Project tihhlawhtlin an tum loh a chiang leh ta hi mipui tan a na a ni,” tiin Mizoram dinchhuahna atan party dang te rintlak loha a ngaih thu sawiin, “Kan ram dinchhuahnan ngaihtuahna tak tak hmang tur leh ṭanrual pui atan mipui ka sawm a ni a ni,” a ti bawk.
