North Hlimen 18th September, 2023: September 18, 2023 (Thawhtanni) hian K. Sapdanga, ZPM Working President chuan Serlui Constituency khaw hrang hrang a tlawh a, Headquarters hruaitu mi eng emaw zatin an tawiawm bawk a ni.
North Hlimen-ah Party hruaitute nen inkawm hona hun hman a ni a, he hun hi Lalchungnunga, General Secretary chuan a kaihruai a, K. Sapdanga chuan thusawiin, “Serlui bial-ah hian ZPM a pian atangin theihtawp chhuahin kan hruaitu ten hma an la a, phur leh tha tho taka kan kal mek laiin candidate tura kan lo puan tawh Pu Jimmy Laltlanmawia chu damlohna avangin thlak an ngai leh ta a, a pawi kan ti hle a, a dam leh thuai theihna turin kan tawngtaipui reng thin a, ani a theih dawn tak lovah chuan a aiawh turin kan party-in kan chhuanvawr zinga mi Pu C. Lalthanfela kan rawn dah leh a, ani hi mi rintlak, pa belhchiandawl tak, kohhran leh khawtlangah pawh mi hming tha tak a ni a, lo thlangtling ngei turin ka sawm che u a ni.
“Ram hmasawnna kan tih hi thil lianpui angin kan sawi thin a, khaw khat hmasawnna hian ram pumpui hmasawnna a thlen thin a, khaw tin kan hmasawn chuan ram hian hma a sawm mai dawn a ni. ZPM hian party dang an hming chhala sawisel bawl bawl te hi kan hreh hle mai a, kan hotute pawh hian chutiang chu ti lo hram turin min chah thin a ni. Chutih lai chuan kan elpui party-te chuan ZPM sawi tel lo hian thu an sawi zo thiam meuh lo a, kan party hming lam hi thupui berah an nei ta hial mai. ZPM hi miten min sawi dan chu in taima ber a, in phur ber bawk tih hi a ni a, kan party mite ai mah hian neutral kan tih te hian ZPM sawrkar hun hi nghakhlel takin an thlir mek a ni. Kan Chief Ministerial Candidate-in a sawi tam em em chu ZPM chu kan thawkrim ber tur a ni a, kan rinawm tur a ni a, eiru ve lo ngam kan ni tur a ni tih hi a ni. Kan hotupa berin chutiang chu min chah thin avangin vawiinah hian kan thawkrim a, thawhrimna hmanga sawrkar tuak chhuah hi kan tum ber a ni,” a ti.
K.Sapdanga chuan, “Kan elpui party-te hian Pu Duha nen inkar nei, harsatna nei angin min sawi thin a, hmun hrang hrangah kan party mite zingah lo awih tawk kan awm leh thin a. Pu Duha nen kan inngeih lo dawn a nih chuan keimah hi a thiam lo zawk ka ni dawn tih lo ring nghal turin ka chah duh che u a ni. Lungrual taka kan kal hlau a phe phe thin te hi dawtsawi tir kan tum a ni. Zoram mipui ten kan thlir thup MLA Election leh MP election a ruala nei tur anga ruahmanna awm anga sawi pawh tun dinhmunah chuan an ti dawn ta lo niin a lang a, November thla chho velah chuan inthlang turah inngai ta ila, campaign nan hun tam kan nei tawh lo a, thahnemngai taka thawk turin i inpuahchah sauh sauh ang u. Kan ram mipui titi tam ber chu sawrkar thar hmel hmuh thuai nghahhlelh thu hi a ni a, sawkar office-ah te, school leh college-ah te, Bazar-ah te, khawhar inah te, Biak in kawtah te hial pawh kan titi tui a lo ni ta mek a ni. Rinawm taka sawrkar hna thawk mek ten thlabi hlawh an la hleithei lo a, kum 13 thawh tawh hnuah pawh Samagra hnuaia thawk te chuan hlawh ngai ngar ngar an la a, chu pawh thla thum danah te an la thei tawk a. Kan news neih te chu, thla thar ni 8 bawrah sawrkar hnathawk te hlawh an pek theih tur thu te a ni ta.
“Hlawh tlai taka kan lak tak chhan te hi thil dang vang ni lovin, tute emaw restricted tender hmanga an duhsak uchuak vang leh SEDP an sem mek te nen hian a inkaihhnawih vek a ni. Sawrkar hnathawkte hian inthlan an nghakhlel em em a, anni aia nghakhlel zawk chu thalaite an ni. Sawrkar tha kan tuak mek a, thalaite’n an nu leh pa party ruh em em thinte kalphung thar mipui sawrkar vote tawh turin an kar mek a ni. Vawiinah hian foreign atangin kan thalaiten an nu leh pa te kalphung thar lo tuakchhuak ngei turin an chah ta mawlh mawlh mai a ni. Sawrkar sikul chu zirlai tlem tial tialna hmunah kan chhuah mek te hi a lungchhiattlak tak zet a ni. Thil tha ti tur hian Delhi aiin a let tam takin chance kan nei tha a, kalphung thar hmanraw hmangin Delhi lehpelh kan tum dawn a, kan theih ngei pawh kan inring a ni. Kan lehpel thei lo a nih pawhin State dang ke pen rual tala kal ve theih erawh kan inbeisei tlat a ni. Naupaw chungin Zonu-in sachek an zuar a, an hlep chu candidate an pe a, mahni hrehawm pawisa lovin ram tha zawk beiseiin thlan tui nen hna an thawk a, sawrkar thar a pian loh hi an hlau em em a ni. ZPM mipuiin min beiseina hi kan tihlawhchham thiang lo va, kan tu leh fa, thang lo thar zel tur te tana chenna thlak ram din thar turin thahnemngai takin ke i pen ang u,” a ti.
