Vawiin April ni 5, 2022 (Thawhlehni) dar 12:30 pm khan MNF President Pu Zoramthanga, Chief Minister ni bawk chuan Multipurpose Hall, Field Veng, Vairengteah Serlui North Block MNF Conference leh mithar lawmluhna hunah khuallian niin a hmanpui a. Phaisen, Phainuam, Saihapui leh Vairengte North leh South atangin mi thar 598-te chu MNF-ah a lawmlut.
Pu Zoramthanga chuan zu zuar sorkar kan hrawn lova kan vanneihzia hi hripui lo leng hian a tilang a. Inthlanpui kan hmachhawn leh turah pawh tun aia tam zawk hruaitu neiin MNF hi a sorkar leh ang a, Varparh Arsi hi a eng zual zel ang a, dona chi hrang hrang leh nekchepna hrang hrang karah min hruai tlattu kan Pathian min hruaina hi kan rinchhan tlat a, nun nel tak nei a, amah kan en tlat a nih chuan hlawhlinna nasa zawk kan chang zel dawn tih a sawi a. Pathian mi ruat kan nihna zawn theuhah Zoram tan penin, chanchintha hril tura min ruatna hre rengin Pathian leh kan ram tan tiin, i ding nghet tlat ang u. MNF hi hnam rilru pu kan ni a, kan chhungkuaah hian tumah a hlui leh a thar kan awm bik lo a, a neitu vek kan ni, rilru nghet puin tan ila thar theuh ang u tiin, party mipuite a fuih a ni.
Kum 2018 Inthlanpui neih dawn khan Vairengte atangin bul kan ṭan tawh a, tunah bul kan han ṭan leh a, bialtu fel tak, tlo leh thahnem ngai em em mai in nei hi a vanneihthlak a, a rinawmna leh chhelnain tun dinhmuna lawmna hi min thlenpui a ni. A rei tulh tulha vannei in inti tulh tulh ang tih ka ring tlat. Ramri buai kara viak tha tak leh huaisen taka a penna hian fak a hlawh telh telh a ni. Thalaite mamawh leh duh em em, Vairengte hmuna phullem phahna tur pek in ni a, a dang pawh a lo la thlen belh zel kan beisei a ni. SEDP hmangin bial tinah a tlem berah chhungkaw 1500-in cheng singnga ṭheuh an dawng dawn a ni. Nakumah ZPM emaw Congress emaw an sorkar loh chuan cheng nuai nga emaw a aia tam pawh chawi turin oppostion-te hi dahkham ngam an awmin a rinawm hauh loh, Pu Zoramthanga chuan a ti.
MNF President chuan Mizoram chanchinbu lian leh TV news lian pakhat chuan Party dang sawt vakna an chhuah a, kan party min bei chiam thin a, an nihna dik tak sawi hian sawt vak emaw min ti thin. Central lamah Congress kaihhruai a tluchhe zel a, UPA hotu mumal tur pawh an vai tan a, an mi beisei Sharad Pawar-a pawhin a tlansan a ni tiin, inthlanpui lo awm lehah congress hian seat 5 an chan chuan a lawmawm ngawt ang, an muk berna hmun West Tuipui pawh RD Block thar avangin an ri hulh hulh tawh a. Mi sang chuangin min rawn luhchilh tawh a, bial dang pawh a kangkai chho mek zel a ni. Congress kunga lawnho chu an chhuk sup sup mai a ni, a ti bawk.
MNF President chuan, “MNF nilo Congress ni lo titu ZPM chuan Party kan ni lo, Movement kan ni, an ti a, mipuiah an intawktarh a, chanchinbu leh TV hmanruaa hman bik neiin an han che tak tak a nih kha, an thawm chu a ring nasa, Chief Minister mai pawh ni lo Super Chief Minister tur an zuar a, mahse, miin an lo hrechiang em em si a, under 10 bak an pel lo. Mi nghet nih a pawimawh fo angin zuansawn zin lutuk hi a pawina a lo lang mek zel a ni. Vawi 10 vel zet nihna party thlak hi tun hnaiah midang tumah sawi tur an awm lo. Tui anga nghet lo hi khawi ramah mah ram hruaitu ropui an awm ngai lo a ni. Mahni party din pawh tlansan duh zel chu han zui chhintu pawhin an tlansan leh thin. Nghet taka kan din chuan, Zoram tan hian a dawt lehah tihtlin kan nih ngei ngei a rinawm a, Zoram mipui pawhin an ring a ni. Party dang sorkar tura sawi thawm hian mite nuih a tiza fo a ni,” a ti bawk.
Hripui leng leh ramri buai karah pawh Buhfai leh Gas-ah harsatna awm lovin tun hi kan thleng thei a. Kawngpui pawh hun hmasaa chhe em em vek mai kha, tunah chuan a tha deuh vek ta mai. Kum 60 chhung min hruaitu kan Pathian hian hun harsaah pawh he ram hruai tur hian min dah a lo ni. MNF hi lo sorkar lo hlauh ta ila, tun dinhmunah hian kan ram hi a ngaihtuahawm ngawtin a rinawm, a ti bawk.
Pu K. Lalrinliana, MNF Adviser leh Minister ni bawk pawhin thusawiin, “Hripui nasa tak, khawvel pum huapa lengin kan ram pawh min zuah bik lova, chutiang karah harsatna a tam teh lul nen, opposition-ho chuan, hre duh hauh lovin, kan Chief Minister leh kan sorkar chu a chhe tinrengin min bei a, mahse, sawichhiatna tinreng kara Pathian kaihhruaina kan dawn tlat hi Mipuiin an hai hauh lova, lang leh mai tura dawt leh thutak chawhpawlha min beihna hrang hrang pawh budget session kan neih zawh takah thudik pholanin a awm a nih kha. Serlui bial mipui bialtu MLA nen lungrual taka in thawhhona hi a ngaihnawmin, a hmuhnawm a. Chhawm nung zel turin ka chah duh che u a ni. Kan party leh kan ram tan malsawmna ni zel turin duhsakna ka hlan che u a ni, a ti bawk.
He huna khualzahawm Pu Lalrinsanga Ralte, MNF Adviser leh Serlui bialtu MLA, Rubber & Allied Crop Dev. Board Vice Chairman pawhin thu sawiin, kan bial chhungah thlichhiain In tam tak min tihchhiatsak avanga nasa taka min puitu kan finance minister leh ramri buai avanga nasa taka harsatna kan tawh laia huaisen taka min chhantu, ramri depa kan chenna cheibawl leh humhalh kawnga nasa taka min pui tlattu, ram tana nghet taka ding, kan CM chungah hian lawmthu ka sawi mawlh mawlh a ni, a ti a. Hripui leng kara min kaihhruaina leh, nghei hauh lova awma mipuite min tuamhlawmnaah Pathian mithlan, amaha ring nghet tlat, Hmeithai fahrah tam tak siamtu Zu do a, Zu chhiah it lo ngam Pu Zoramthanga chungah hian kan lawm takzet a ni, a ti bawk.
Conference a kalkhawmte hian Pu H. Lalhlimpuia, Vice President, Serlui N Block Resolution put luh chu lungrual takin hetiang hian an pass bawk.
1. Mizoramin Assam nen a ramri buai kan tawh chungchangah kan Chief Minister zahawm tak Pu Zoramthanga hmalakna hi ropui kan ti a, ramri humhalhna tura ramri dep khuate hmasawnna tura huaisen taka hma la ngam, Pu Zoramthanga kaihhruai MNF sorkar kan nei hi lawmawm kan tiin kan chhuang takzet a ni.
2. Sorkar kal tawhtena an la tih ngai loh, ramri humhalhna tura Serlui bial chhunga kawng Km 100 chuang laih a ni hi ropui kan tiin heng ramri kawng laihte hi kut hnathawktuten kan chhawr tangkai nghal zel theih avangin lawmawm kan ti takzet a.Tin, Ramri dep khuaten kan mamawh em em, Vairengteah IR Company Hqrs min dahsak avangin kan Chief Minister zahawm tak Pu Zoramthanga kaihhruai sorkar chungah thinlung takin lawmthu kan sawi a ni.
3. Khawvel pum huapa hrileng karah kan Chief Minister zahawm tak Pu Zoramthanga, Finance Minister ni bawkin, fing leh remhre taka sum leh pai a enkawlna avanga harsa lutuk lova sorkar a kalpui thei leh Mizoram mipui ei leh bara thlaphang lova min siam thei hi ropui kan ti takzet a, Mizoramin Finance Minister kan neih tawh zingah chuan tuna kan Finance Minister aia tha an la awm lovin, kan Finance Minister, Chief Minister ni bawk Pu Zoramthanga hi kan chhuang takzet a ni.
4. Hun harsa, ramri buai leh hripui leng karah Serlui bial mipui min thlamuan a, a bial mipuite tana theihtawp min chhuahsak thintu, Pu Lalrinsanga Ralte kan nei hi lawmawm kan ti takzet a, Serlui bial tana ‘Pa’ chan changa Development chak taka min siamsak thintu kan Chief Minister zahawm tak Pu Zoramthanga chungah thinlung takin lawmthu kan sawi tak meuh meuh a ni.
He hun hi Pu B. Lalnuntluanga, President Serlui N. Block-in kaihruaiin, Pastor Lalpianthanga, UPC NEI-in hunserh hmangin, Pu B.Pazawna, NCM-in lawmthusawiin hun hnung a khar a ni.
MNF President, Pu Zoramthanga hi Pu K.Lalrinliana Minister, Pu Lalrinsanga Ralte MLA, Pu K. Laldawngliana MLA leh Party hruaitu engemaw zatin Aizawl leh Kolasib atangin an tawiawm bawk.
MNF President hian kal pah hian Sairang daia State supply Godown hmun atana beisei ram te enkawiin, a hmunhmate fankual a ni bawk.
