Shillong-ah zirlai lut tharte puala Freshers Social hmanpui

Shillong Mizo Students’ Union-in Shillong-a zirlai lut tharte puala Freshers Social Function chu vawiin khan Tourism Minister Robert Romawia Royte chuan Khuallian niin a hmanpui a. Dr K.Pachhunga, MLA & Vice Chairman, Bamboo Development Board pawh khualzahawm niin a tel ve bawk.
Function hi NEHU Convocation Hall-ah hman niin Shillong MSU Vice President-in inlawmna thusawiin, zirlai titha chawimawina leh cultural items hmuhnawm tak bakah zaithiam zaite ngaihthlak a ni a. Khasi Students Union General Hqrs Gen Secretary Donald Thaba pawhin thu a sawi.
He huna Khuallian Tourism Minister Robert Romawia Royte chuan “Shillong khawpui chu India independent hma daih atanga Mizote lehkha zirna hmunpui a ni a, vawiin thlengin Mizote tan thiam zirna hmun hlu leh pawimawh a ni a ti a. Shillong chu hmanlai atangin Mizo hnam Nationalism awi nunna, Mizo tam takin Hnam veina thinlung an neih phahna chhan a ni a, Mizote tan a pawimawh zual zel a ni a ti. Khawvel history enin Nationalism based-in rama piangin ramrite siam a ni a, Europe ram ropuina chhan pawh hnam hmangaihna leh veina rilru an neih vang a ni Minister chuan tiin Shillong Mizo zirlaite chu Mizo nationalism nunpuia thanlenpui turin a chah a. NE hnam dangte mai bakah hmun hrang hrang atanga Mizo fuankhawmna a ni chuan Shillong-a tawnhriat neih hi a hlu bik a ni a ti. Shillong-a Zirlai lut tharte chu Kohhran leh YMA leh MSU te bel tlat turin a chah a, nasa taka lehkha zira nu leh pate chunga lawmna chang hre turin a chah a ni.
Khualzahawm Dr K.Pachhunga, MLA pawhin thusawiin zirlaite chu rinawm taka zira awm turin a fuih a ni.He hunah hian Shillong MSU President John Lalchhanchhuaha pawhin lawmthusawiin Zirlai tithate chawimawina a kaihhruaia, hnam hrang hrang atanga zirlai hruaitu lo kalte chungah lawmthu a sawi a ni. He hunah hian T.Melody Band leh zaithiam dang te an zai a, Shillong zirlai 1000 chuang lai kalkhawmte an hlim hle a ni.
Khuallian Sports Minister Robert Romawia Royte chuan sawm bikte pualin Zanriah a buatsaih a ni.