Chief Minister Lalduhoma chuan Mizoram atanga India ram pawna hnathawk tur thawn chhuah chungchangah siamthat hna an thawh thu vawiina CMO Conference Hall-a press conference a neihnaah a sawi.
Chief minister chuan zawhna chhangin, India ram pawna hnathawk tur thawn chhuah theihna dan chu Mizorama siam theih a ni lo tih sawiin, “Mizorama Congress Sorkar lai khan India ram pawna hnathawk tur thawn chhuah theihna dan an siam a, chumi hmang chuan MNF Sorkar khan mi engemaw zat permit a pe a.
“Mizoram Sorkarin permit a pek avangin agency-ten India ram pawnah hnathawk tur an thawn chhuak ve ringawt a. Agency-te hian kan sorkar hnuah min rawn hmu a, mi thawn chhuah theihna an neih loh avangin thawn chhuak tawh lo turin ka hriattir a. India ram pawna mi thawn chhuak tur chuan Immigration Act, 1983 hnuai Protector of Immigrant hnuaiah license neih a ngai a, Protector of Immigrant hnuaiah hian license neih tum turin thurawn kan pe nghe nghe a ni,” a ti.
Chief Minister chuan hnathawktu thawn chhuak tura Mizoram Sorkarin dan a neih chu siamthat a nih dawn thu sawiin, ‘Hnathawk tur thawn chhuahah a siamthat hna kan thawk mek,’ a ti a.
Zu zawrh leh zawrh loh chungchang mi an rawn tawh leh tawh loh zawhna chhangin Chief Minister chuan, ‘Tumah rawn kan la nei lo,’ tiin Excise Minister-in tul a tih angin a la rawn chhawp chhoh tur thu a sawi bawk.
