Vawiin chhun dar 12:30 khan Congress Thalai – Mizoram Pradesh Youth Congress Committee (MPYCC) chuan an President Dr.Lalmalsawma Nghaka hovin Sihphir Venghlun Multipurpose Cooperative Society Ltd. hnuaia din Primary Agriculture Credit Society.(PACS) an tlawh a. Sihphir Venghlun PACS hruaituten lo dawngsawngin, Society kal dan phung zir ho a ni.
He hunah hian Dr.Lalmalsawma Nghaka President,MPYCC chuan, “Vawiin niah a mamawh tak takte loneitu, nitin eichawp zawng leh bul tan thar tum te tana loan lak harsat em em laia, Sihphir Venghlun-ah PACS kuthnathawktute leh nitin eichawp zawng harsa zawkte bulṭan pui ngaite tana ding a, a pung tlem zawka loan, a mamawhtute tana in pe chhuak hi a lawmawm takzet a ni.
Kuthnathawk, mahni thlai thar hralhtute leh nitin eichawp zawngten sum han dahluh mai theih tura society din a ni hi a lawmawm takzet zet a ni. Congress Party chuan kan President Pu Lalsawta hovin Self-help group, Cooperative Society leh Primary Agriculture Credit Society (PACS) kaltlang hian a mamawhtute tan theihtawp chhuaha ṭang te puih hi ram economics chawi chhuah nan hman kan tum a ni. Kan Manifesto zinga kan ngaipawimawh ber pakhat a ni, an hlawh tlin theih nan thapui kan thawh dawn a, an mamawh infrastructure leh budget te pawh ngaipawimawh ani dawn ani. Mizote hi hnam rinawm kan ni tih hi pawl leh kohhran kan enkawl danah hian a chian hle laiin, kan ramah kut tling lo hmanga sum lalut erawh an awm zut tawh a, kan hnam hmel tibaltu pawh an ni. Nangni erawh chuan rinawm tak leh mumal taka kut hnathawktu mi harsate te te sum dahkhawm hmangin, bulṭan duhte tan bul in ṭan sak a, kan ram leh hnam khaichhuahna tura pasalṭha inni. Ram a changkang zel a, a hlutzia hi kan hrechiang zel ang a, kan uar tial tial ang”, a ti.
Sihphir Venghlun Society te pawhin thusawiin, society kalphung an sawi a, “Tuna PACS kan din ang hi ram leh hnam economics dinhmun khaihchhuah nan a tluka ṭha hi a awm lo. Mizoram khawtin, vengtinah hian din vek nise kan ram leh kan hnam hi a dam ang tih kan ring a ni”, an ti.
Sihphir Venghlun PACS hi kumin 2022 May ni 21 khan dinin, Member 208 niin, account holder 281 niin, tunah hian nuai 60 vel sum deposit a ni a. An hnen aṭang hian a mamawh ten sum tlemte pungin bulṭan nan loan an la ṭhin. Tunah hian Mizoramah hian PACS hi 34 din a ni tawh a ni.
