Mizoram AAP chuan Skywalk/Skybridge, Aizawl Peak Resort, Zuangtui a mi, kumin February Ni 18 a Chief Minister in a hawn tak kha RTI-a chhanna hmuh danin phalna neilo a sak a nih thu an sawi a. “Aizawl Municipal area a AMC hriatpuina tello a sak a ni hi mak kan ti hle a, he skywalk neitu pawh hi ZPM MLA ni a sawi awm hi hriatchian kan chak hle a ni,” an ti.
AAP Mizoram chuan, “He Skywalk/Skybridge hi a ṭha in Mizoram tan leh Mizo-te tan inchhuanna tham a tling tak meuh a. Amaherawhchu AMC huam chhung ami AMC hriatpuina leh endikna tello a an siam hi a him tawk lo ang tih kan hlau hle a ni.
“Tin, Social media a kan hmuh anga balu bag 600 dahchhin hmanga a him tawk leh tawk loh enfiah a ni hi a tak a nih ngai chuan modern technology tha ber hman a ni lo tihna a ni a, chhiatrupna thleng thei reng ni-ah ngaih loh a harsa kan ti hle bawk.
“He Skywalk hi Mizoram tan pawh a ṭangkai tak la ni zel tur hi engatinge AMC hriattir lo leh phalna nei lo a siam a ni tihte leh AMC lamin engatinge an hriatpui loh a siam/sak hi hma an lak loh leh hemi phenah hian Sorkara thuneitu liante an inrawlh em, tih hi kan zawhna a ni,” an ti bawk.
