Mizoram Legislative Assembly Speaker Lalrinliana Sailo chuan nimina Mizoram Journalists’ Association (MJA) khawmpui vawi 48-na a hmanpuinaah, “Tunlai hian Mizoram chu social media in min run nasa a, sulhnu tha lo Zofa lo kal zel atan min thlen thin a, hei hi a tha lo hle a, hemi her dik tur hian MJA ten tan an lak angai a ni,” a ti a. Hetiang thil tha lo her dik tur hian MJA te a chah a, thudik sawi leh hailang tur in a sawm nghal bawk.
“Journalist dik tak chuan an thuziak leh chhuah turte an uluk thin a, hetih rual hian social media in min nuaina karah social media a fimkhur lo tak takte vangin inhuatna leh intualvuakna a thleng thut thut thei a ni a, kan fimkhur a ngai hle,” Speaker chuan a ti a. “Social media hman dik lohna chuan ram rorelnaah thudik leh thutak a tibuai a, a dik taka ziaka ziakte a ti tima, zahawmna a tikiam ni. Tun hma lama Europe ram tlu chhe tawh tung dingtute chu journalist te an ni a, ram siam tha tur hian journalist ten nasa takin hna an thawk thei a ni,” tiin “Journalists dik tak chu a fimkhur anga, an huai bawk tur a ni,” a ti bawk.
Assembly Speaker chuan, “Mizoram economy chu chhe lai let der a ni lo, kan ram economy leh GSDP thandan hi India ramah 11 na a ni a, Mizoram economy hi nasa takin a thang a ni,” a ti a. Mizoram budget in kumtin hma a sawn a ni. He ram hi kan chenna a ni a, kan la cheng zel dawn bawk, a that leh that lohnaah mawhphurtu kan ni a. Kan ram hi a chhe laiah chauh in sawisel lovin, a thalaiah pawh in fak ang u. Chumi tur chuan electronic leh print media te tan tlat a ngai a ni,” a ti bawk.
Mizoram Journalists’ Association chuan chawhnu lamah kum 2022-2024 chhunga hruaitu tur a hnuai a mi ang hian an thlang chhuak bawk.
President
C.Lalrambuatsaiha
Vice President
Lalremsiama
Treasurer
C.Lalhmachhuana
Executive Committee Members
Zohmingmawia, The Aizawl Post
C.Lalduhawma, LPS
Joseph Lallnuntluanga, Zorin
F Lalrinfela, Zalen
H.Lalchhandama, The Aizawl Post
Lalnunzira Chawngthu, DDK
Alfred Vanchhawng, DDK
T. Lalbiakdika, Zawlbuk
Chhuanvawra, Lentlang
Lalrinmawia, Vanglaini
K, Zothanpara, Vanglaini
