Social Welfare Minister-in National Girl Child Day hawng

Kar khat awh tur National Girl Child Day, 2023 lawmna chu vawiin khan Social Welfare Minister Er. Lalrinawma’n a pisaah a hawng.
He ni hawnna puala programme buatsaihah Er.Lalrinawma chuan hmeichhe naupang te himna leh dikna chanvo humhalh a tul zia inzirtirna atana kar khat chhung hun bik hman turah hian thinlung taka hmang theuh turin kalkhawm te a sawm a. Hmeichhe naupang te pual ni pawimawh takah hian an tana khawvel chhenfakawm, ralmuang, thlamuang leh him siam a tul tak zet tih Minister chuan a sawi. Nuten fate thu tha kan hrilh a pawimawh tiin Er.Lalrinawma chuan mipa pawh, hmeichhia pawh, paia, hring a, chawi lian tu chu nu te an ni, a ti a. Fate chuan anmahni enkawltu nu te thu an ngaichang thin a, chuvangin hmeichhe naupang te tana khawvel tha siam tur chuan a bultanna leh a hlawhtlinna thui tak chu hmeichhia te ah a innghat a, nu ten kan fate hnenah hmeichhiate zah tur leh en hrang lo tura kan zirtir a ngai a ni, a ti.
Programme ah hian Social Welfare Minister Er.Lalrinawma kaihhruaiin National Girl Child Day pualin kalkhawmten intiamkamna (pledge) an sawi rual a. Hmeichhe naupangten him tak leh thlamuang taka khawvel an hman theihna tur leh zirna leh thiamna changtlung an neih zel theihna turin, anmahni venghlim tlat chunga theihtawp chhuah turin thu an tiam a ni. Hawnna inkhawma tel te hian intiamkamna thu an chham bakah a puala buatsaih signature campaign neih nghal a ni bawk.
Mizoram Secretariat building sir hmun remchangah Minister hian National Girl Child Day, 2023 pualin Moringa thing tiak a phun bawk a ni.
National Girl Child Day hi Jan. 18 atanga January 24 thleng hman tur a ni a. Hmeichhe zirlaite tan hmeichhe naupang hlutna lam pholang thei Painting Competition buatsaih te; Mizoram State Sports Council te nena tangkawpin hmeichhe naupangte zinga sports lam uar tura infuihna hun te; Beti Bachao Beti Padhao (BBBP) scheme lam hawi thuziak sawrkar leh mimal ina tar te; hmeichhe fate hlutna lam hawi poster leh slogan writing competition buatsaih te; Special Gram Sabha koin, naupangte humhim leh hmeichhiate tana skill devolopment pawimawhna zirho te; kohhran leh khawtlang hruaitute nen kum tling loa inneih thatlohna te zirho a ni ang. Pre conception and Pre Natal Diagnostic Technique leh Medical Termination of Pregnancy (hmeichhe fa tihtlak venna dan) leh hmeichhe humhalhna dan te talk show buatsaih a ni dawn a, hei hi Cable TV leh DDK kaltlangin pek chhuah a ni ang.