Aizawl, 8/9/2022: Vawiin hian Lal Thanhawla Auditorium, Congress Bhavan, Tuikual South MPCC chuan ‘Aizawl City Block Join Conference’ an nei a, Congress Treasurer Pu Zodintluanga Ralte chuan thu sawiin, “Vawiin Assembly Session-ah rorel lai bill put luh chu mipui chan tur zangnadawmna atanga 15% lo lak vena tur a ni, mipui hi min sawr fe pawh a ni lo, a fawhin min fawp kang vek a ni,” a ti.
ZPM fan a tawp tawh thu sawiin, “ZPM hian theih tawp an chhuaha vawiina an dinhmun hi an thleng thei tawk a ni. Hmun tinah Unit din an tuma kan hotute an sawm vek, vawiin ni hi an thlen chin a ni. Hei baka hmasawnna tur an nei lo, Congress party chuan bul kan tan chauh a ni, a zam awm loh,” Zodintluanga chuan a ti bawk.
MNF hian anmahni hian sorkar leh em em an tumin a lang lo, sorkar leh tum se sorkar tha tak an siam ka ring. An pu ber a zir loh avangin sum bawihah an awm tawh, sum ringawt an ngaihtuah a ni, a ti a.
“Han hawi vel teh u, Chief Minister Pu Zoramthanga’n thu a sawi apiangin nuihzat turin an en a ni. A kalna apiangah ‘motorcade’ a neih a ngaia chutianga nam ngai chu amah pawh a nuih a za ve ang. Bul kan la tan ve hlei nem, vawiinah bul kan tan chauh a ni lawm ni,” tiin Congress bultanna chu a lawmawm thu Congress Treasurer hian a sawi.
Party mi kalkhawmte fuihin, “Kan sorkarna tur kawng atan hawh u i thawk ang u, kan ram hi Congress a sorkar loh chuan a ngui thin, MNF sorkar hmasak khan khawpui daiah hel camp an siam a, khawpui chhungah ruang an chhara sum a harsa a nih kha. Congress sorkar khan MNF tihchhiat zawng zawng tuna kan President Pu Sawta Finance chan lai khan kan siamtha a, COVID do theia vawiina kan awm chhan hi Congress sorkar hmasa that vang chauh kha a ni,” tiin Zodintluanga chuan a sawi.
Congress MLA chuan, “Tui bill a pung a, Electric bill kan pek hleih theih loh khawpin a kum telin an ti pung a. Vawiina Assembly House-a an bill put luh chu mimalin Central atanga mipui ‘compensation ‘ an lak atangin 15% i lak sak ang u an ti a ni, mipui hi a sawrin min sawr tawh lo, a fawhin min fawp a ni. Chuvangin he ram kan hnam siamtha leh tur hian Congress hi Zoram mipui hian min en a ni,” a ti a.
“ZPM party ngati nge an ngiau ngerh em em, ngiau ngerh lo chi an ni lo, tumah mil thei lo kalkhawm an nia, ram ropui an thlen dawn lo. Kan sorkar leh a turin kan taimak a ngai. Kuthnathawktu lo nei mite chhanchhuahna tur kan siam a ngai, mi rethei chhanchhuahna programme, thalaite eizawnna nghet kan siamna turah hian kan sorkar a ngai a, kan sorkar chuan an dil ngai lovin kan ti ang,” a ti.
Zodintluanga chuan, “Hnathawktu chuan kan thawhrah hi kan seng em em ang, party kan awma kan ram siamthatna tura theih tawp kan chhuah hian keimahni tan pawh kan thawk tel a ni. Kan thawhrah hi kan tel dawn, Headquarters-a hruaitute leh Aizawl khaw chhunga block leh unit hruaitute, kan bultanna hi a thain a lian a ni. A lian chho telh telh dawn a ni,” a ti.
