Sorkar hmalakna ngaichangin Pen Down Strike tintuah

Samagra hnuaia thawk inzawmkhawm pawl FEMSE chuan an hlawh chungchang a sorkar hmalakna kal zel dan an thlirin lungawi thlak loh an tih thu an sawi a. Hei vang hian dt. 7.7.2022 atangin Badge Dum kan bel tan a. An hmalakna ten rah tha a chhuah loh chuan dt. 11.7.2022 atangin Pen Down Strike an nei dawn a ni.
Samagra hnuaia thawkte hian kum 2019, November khan an hlawh chungchangah lungawi lovin an lo nuar tawh a, chumi hmalakna kal zel chuan Sorkar in Study Team a din sak a, chu Study Team Recommendation chu sorkar ah thlen leh niin, Finance Department lam ten hun rei tak chhung an enfiah hnuah leh hemi kaihhnawih Dept. hrang hrang ten an ngaihtuah hnu leh CM approval lak a nih hnuin Cabinet Meeting Agenda ah dah a ni ta a ni. Chutih mek laiin, beisei taka an lo thlir leh ngaihtha taka an awm hnua Cabinet in min pawm sak thei lo chu mak an tiin, an rilru a nat thu an sawi a, “Hemi avang hian zawl dawh taka sorkar nawr reng hi thil theih niin kan hre ta lo a, chumi avang chuan na zawka sorkar nawr kan rel ta a ni. Heng kan ruahmanna te hian awmzia a neilo anih chuan ni 15.7.2022 hian FEMSE Council chuan kal zel dan tur a ngaihtuah leh ang,” an ti.
“FEMSE in kan hlawh chungchanga hma kan laknaah hian kan Education Minister zahawm tak Lalchhamdama Ralte leh Education dept te hma min lakpuina leh theihtawp min chhuah saknaah hian kan lawm tak zet a, hma min lakpuina avangin thui tak kan thleng thei a, la hlawhtling chiah lo mah ila beiseina sangtak kan nei bawk a ni.
“Samagra hnuaia thawkten Pen Down Strike kan neih hian nghawng nasa tak a nei dawn tih kan hria a, Office lama hna tam takin a tawrh dawn bakah sikul naupangten an tuar nasa hle dawn tih kan hria a, exam hun hnai tawh takah naupang zirtirna kan pe thei lo tur hi hreawm kan tiin a pawi ka ti tak zet a ni. Kan nitin hnathawha theihtawp kan chhuah mek lai leh beiseina sang tak kan neih laia Sorkar laka lungawi lohna kan lantir avanga tuartu zoram mipui leh zirlai zawng zawngte hriatthiamna kan ngen tak meuh meuh a ni,” an ti.