Hachhek Bial Kuhva Chingtu Pawl (HBKCP) chuan thuchhuah siamin, “Kan eizawnna ber Kuhva hralh kawnga harsatna min siamtu, ramdang atanga dan lo a Kuhva tawlh luh a tawp theih nan nasa takin HBKCP chuan hma ala a. Kuhva huan siamtu tlawmngaia duty te pawhin dan lo a Kuhva ro tawlh hi engemaw zat alo man tawh a ni.
“Kuhva tawlhruk dang chat tur hian Mizoram Sorkar tharah beiseina sang tak kan nei a, sorkar hmalak tum dan leh hmalak chhoh dan pawh lawmawm kan ti hle. Sorkarin theihtawp a chhuah mek ni a kan hriat laiin, Kuhva ro tawlhte hian an tihdan pangngaiin an la tawlhru reng niin kan hria a. Customs, Asaam Rifles, Mizoram Police leh Kuthnathawktu duty te pawhin thahnem tak tak an la man reng a. Hemi anih avang hian HBKCP pawhin Kuhva tawlhru te dang tur hian a duty leh dawn a. Kuhva tawlhru thinte lokal lo turin kan hriattir nghal e.
“Dan lo a Kuhva ro tawlh chungchanga Social activist Pi Vanramchhuangi’n Gauhati High Court Aizawl Bench-a PIL a thehlut kha lawmawm kan ti a. He thubuai hi CBI ten chhui tura High Court a ngenna hi High Court-in a pawm ngei pawh kan beisei laia, Mizoram sorkar-in CBI chhuitir lo a, Mizoram Police te chhuitir tura High Court-ah ngenna a siam ta mai hi pawi kan tiin Kuhva chingtute hmakhua a ngai tawk lo ah kan ngai. Kuhva ro chungchanga PIL hi CBI chhui remti ngei turin HBKCP chuan Mizoram Sorkar kan ngen a ni.
“Kuhva tawlh ruk PIL chungchanga Gauhati High Court, Division Bench order Dt.22.1.2024 in a sawi anga kum 2021-a FIR thehluh tawh tun thlenga register anih loh chhan sawifiah tura a tih te, Case thara register theih a nih thu a sawite hi bawhzui a, Court-in sorkar chu he case hi a ngai thutak tawklo a tihte hi a pawi kan ti a. Kuhhnathawktute hmakhaw ngaia Kuhva chingtute tana huaitaka ding a, hmala turin Mizoram Sorkar kan phutin kan ngen a ni.
“Mizoram sorkarin a ram mipui kuthnathawktute tana thlai thenkhata Minimum Support Price a siam turah hian Kuhva telh ve ngei turin kan ngen a. Dan loa Kuhva ro tawlh te avangin kan Kuhva tharte hralh a harin a man a tlahniam zel a. Kuminah pawh Kuhva rah lo zo vek tawh siin Kuhva chingtu mi engemaw zatin a man pawh kan la dawng kim theilo a ni. Kuhva chingtute au aw hi ngun taka min lo ngaihthlak sak turin Mizoram sorkar kan ngen e,” tiin an tarlang.
