Aizawl, 27th March, 2023: Vawiin March ni 27, 2023 (thawhtanni) hian ZPM chuan party office-ah chhung inkhawm kan hmang a. Inkhawm hi R. Sanghnuna General Secretary-in a kaihruai a, Laltanpuia Zote, Vice President, ZPM Thalaiin hunserh a hmang. ZPM zawm thar mi pariat (8) te chu Pu Lalliansawta, President-in a lawm lut. Lawmluhna thu sawiin Lalliansawta chuan, chhung inkhawm apianga mi thar duhawm tak tak lawm luh tur kan neih reng bakah chhim lamah te leh Zoram hmun hrang hranga ZPM zawmtu an pun zel avanga lawmthu sawiin Pathian malsawmna a nih thu a sawi.
ZPM President chuan, “ZPM hian kan ram hi siam that a ngai a ni tih hriain kan rama mipui sorkar leh kalphung thar tha zawka ram siam kan tum a, chumi atana thawhpui tur kan nei zel hi a lawmawm tak meuh a ni,” a ti a. “Tunah hian Lunglei Municipal Council inthlan kan hmachhawn mek a. Lunglei mipuite pawhin an hriat atan ka duh chu, kan ram hi mi pamhamte’n an palzut mai mai loh nan leh sum leh therhlo hmanga mahni zahawmna hralh lo turin ka ngen duh a ni,” a ti. “Intodelh lo, eng sum mai pawh khulam sum ringa khawsa mai mai nih reng hi kan ram tan a tawk tawh lo a. Chhungkaw zahawm leh intodelh kan nih hun hi kan thlir a, kan ram siam tha tur hian ZPM atangin hna i thawk ang u,” a ti bawk.
He huna thusawitu dang Lalchhuanthanga, Aizawl South-II bialtu MLA chuan, “Lunglei Municipal Council inthlan turah kan party-in candidate kan nei tha a, kan zam lo bawk a, kan thawhrah pawh ni lovin, ruling hnathawh mumal awm lo hian ZPM a tilian a. LMC-ah sawrkar ngei kan inbeisei a ni,” a ti. “Kan sorkar hrawn mek hian sum hmatheha vote zawn chiah tih thiam an nei a. An hnathawh hmanga mipui ngaihzawn an hlawh lo a ni. Lunglei saw kan khawpui lian 2-na a ni a. RTPCR leh kawng chhia ringawt pawh saw ruling party tan chuan inthlahrunna tur a ni a. Assembly Session-ah Lunglei atanga MLA kan neihte hian Lunglei bakah a piah lam thlenga harsatna engmah an sawi chhuak ngam lo thin a, tunah LMC inthlan dawnah mipui bum tumin an inhampuar ve mek a ni,” a ti bawk.
