MBSE Conference Hall, Chaltlang-ah vawiin khan School Education Minister Lalchhandama Ralte chuan Mizoram Board of School Education (MBSE) lehkhabu buatsaih, ‘Mizo Tawng Ziah Dan’, Fourth Edition 2022, (Revised & Enlarged) tih a tlangzarh.
He tlangzarhna hunah hian School Education Minister Lalchhandama Ralte chuan Mizo tawng ziah dana tute pawhin an rawn theih tur lehkhabu tha tak ‘Mizo Tawng Ziah Dan’ tih chhuah a ni leh ta chu lawmawm a tih thu a sawi a. Minister chuan MBSE hnathawhin hma a sawn zel a, mipui beiseina pawh a lian chho zel a ti a. Mizo mipuiin an laka rinna an nghah zel theih nan fimkhur tur te, an hna theuh thiam tha tur te leh thuruk vawn kawngah te pawh rinawm turin a sawm. MBSE hnuaia Mizo Language Committee (MLC) chu ram leh hnam tan Mizo tawng ziah dan tihhmasawn kawngah tan la zel turin a sawm bawk. Hripui leng avanga India leh khawvel pum a buai vanglai pawhin MBSE-in a hun takah Board Exam an buatsaih a, result pawh a chhuah hun dik takah an tichhuak thei chu chhuanawm a tih thu a sawi a, ram tana an hnathawh hi lian tak a ni a, hetianga ti ve thei state dang an awm lo a ni a ti.
Minister chuan Human Resource Development hnuaiah Language Development Board din a nih thu leh February, 2022-ah Assembly pawhin a pawm tawh thute a sawi a. A takin hna la thawk lo mahse, hnathawhna tur dan leh hraite, an office tur leh mamawh chi hrang hrang buaipui mek a nih thu a sawi bawk.
MBSE Secretary Sarah Lalengzami Pachuau chuan MBSE hnuaia Mizo Language Committee chuan kum 16 chhung zet Mizo tawng tihhmasawn kawngah hma a lak thu te, tuna lehkhabu an tih chhuah pawh an kutchhuak anih thu leh chhut vawi 4-na anih mai bakah ennawna tihlen anih thu a sawi. Secretary chuan MBSE-in tawng pahnih Mizo tawng leh Sap tawnga ziah ‘bilingual textbook’ Science leh Mathematics chu buatsaih mek a nih thu leh tun atanga rei vak lovah zawh theih mai an beisei thu a sawi bawk.
Mizo Language Committee Convener Prof. R.L.Thanmawia chuan lehkhabu kalphung leh buatsaih dan a sawi a, lehkhabu chu hlawm hnih, thumal ziah zawm tur leh zawm loh tur sawi chianna leh tute pawhin an rawn theih tur dictionary anga hman theih thumal ziah zawm chi leh zawm loh chi dahkhawmna a ni tih a sawi. MLC ten Mizo tawng ziah dan lehkhabu an lo tihchhuah tawhte chu Bible lehlinna atan hman nghal zel a ni a, MZU a Mizo Department pawhin an zui nghal zel a ni a ti bawk.
Lehkhabu tlangzarh inkhawm hi J. H. Zoremthanga, Chairman MBSE-in a kaihruai a, MBSE-in Mizo tawng ziah dan lehkhabu an tihchhuah chu sorkarin a pawmpui awm chhun a nih thu a sawi.
